Ўзбекистон 2021 йилнинг ўн ойи мобайнида қутуриш касаллиги бўйича ҳайвонлардан олинган 500 га яқин намунанинг бирортасида қутириш касаллиги аниқланмаган. Бу ҳақда Республика ҳайвонлар касалликлари ташхиси ва озиқ-овқат маҳсулотлари хавфсизлиги давлат маркази директори Бахриддин Тангяриков «Дарё»га маълум қилди.
Бахриддин Тангяриковнинг маълум қилишича, марказ лабораториясига ҳайвон ёки паррандада касалга гумон қилиб олиб келинган намунанинг тест жавоби 2 соат мобайнида чиқариб берилади.
«Бизда парранда гриппи, ҳайвонларнинг қутуриш касаллиги ва барча вирус касалликларини текшириш учун экспресс тест наборларимиз бор. Ўтган ўн ой мобайнида республика бўйича қутуриш касаллиги билан олинган 500 га яқин намунадан бирортасида мусбат натижа чиқмаган. Лабораториямизга келган 20 дан ортиқ намунада қутуриш касаллиги аниқлангани йўқ. Бизда мусбат натижа қайд этилмади», — деди марказ раҳбари.
Таъкидланишича, қутуриш касаллиги фақат ҳайвондан одамга юқади.
«Касаллик одамдан одамга юқмайди. Жароҳат олинган жойга сўлак тушадиган бўлса, қутуриш келиб чиқади. Яширин даври — сўлак тушган ёки тишланган жой олий нерв системасига қанчалик яқинлигига боғлиқ. Агар жароҳат оёқда бўлса, 2-3 ойдан кейин қутуриш мумкин. Жароҳат бошда бўладиган бўлса 20 кунда келиб чиқади. Дастлабки босқичда оёқлар, нафас олиш органлари — томоқ ёки пастки жағ қисми фалажланади. Натижада касал одам комага тушиб, вафот этиши мумкин», — деди Бахриддин Тангяриков.
Мутахассиснинг алоҳида таъкидлашича, Республика ҳудудида ҳайвонларнинг ўта хавфли юқумли: куйдирги, қутуриш каби касалликлар бўйича соғлом эпизоотик вазият сақланмоқда. Халқаро эпизоотик бюронинг бу йилги ҳисоботи бўйича Ўзбекистон яшил ҳудудга киритилган.
Ветеринария ва чорвачиликни ривожлантириш давлат қўмитаси ахборот хизмати маълумотларига кўра, жорий йилнинг ўтган даври мобайнида 2,5 миллиондан ортиқ ит қутуриш касаллигига қарши эмланган.
Ҳукумат қарорига кўра, куйдирги, ўлат, қутириш, ботулизм, парранда гриппи ва бошқа бир қанча касалликлар билан касалланган ёки гумон қилинган ҳайвонлар гўшт учун сўйиш тақиқланади.