«Биз Россияга қулларни жўнатмаяпмиз, яхши ишларни берувчилар билан шартнома қиляпмиз» — Бандлик ва меҳнат муносабатлари вазирлиги

Россияда ишламоқчи бўлган ўзбекистонликларга қурилиш соҳасида 10 мингта иш ўрни таклиф этилганди. Бандлик ва меҳнат муносабатлари вазирлиги матбуот хизмати раҳбари Мавжуда Мирзаева 8 ноябрь куни ўтказилган матбуот анжуманида бу ҳақда батафсил маълумот берди, деб хабар бермоқда «Дарё» мухбири.

Унинг маълум қилишича, Ўзбекистон фуқароларини Россияда қурилиш соҳасида меҳнат фаолиятини амалга оширишга жалб қилиш бўйича пилот лойиҳаси доирасида касбий танлов ўтказилмоқда.

«Агар қонуний йўл билан ишлаш учун кетган бўлса, Бандлик ва меҳнат муносабатлари вазирлиги ҳар доим уларнинг ҳуқуқини ҳамма жойда ҳимоя қила оламиз. Агар ноқонуний, айланма йўллар билан кетиб, ҳужжатсиз фаолият юритадиган бўлса, бизнинг вазирлик ҳеч қандай ёрдам бера олмайди, афсуски. Биз қулларни жўнатмаяпмиз. Яхши ишларни берувчилар билан шартнома қиляпмиз ва шу асосида фуқароларимиз қандай шароитда, қандай ойлик олиши доимий равишда назорат қилиб борилади», — дейди Мавжуда Мирзаева.

Ишлаш истагини билдирган Ўзбекистон фуқароларига тиббий кўрикдан ўтиш, эмлаш, рус тили, Россия тарихи ва қонунчилиги бўйича имтиҳон топшириш, патент расмийлаштириш ва транспорт харажатлари иш берувчи томонидан қоплаб берилиши қайд этилди.

Маълумот учун, 2021 йилнинг сентябрида Россия меҳнат ва ижтимоий ҳимоя вазири ўринбосари А.Пудов бошчилигида қатор давлат ташкилотлари ва йирик иш берувчи корхоналар вакилларидан иборат делегациянинг Ўзбекистонга ташрифи доирасида меҳнат миграцияси масалаларига бағишланган музокаралар ўтказилганди. Унда қурилиш соҳасида меҳнат фаолиятини амалга ошириш учун 10 минг фуқарони яқин вақт давомида соддалаштирилган тартиб асосида Ўзбекистондан Россияга ишга жалб қилишга келишилган эди.

Мазкур фуқароларни ташкилий тарзда ишга жўнатиш лойиҳаси доирасида уларни мамлакат ҳудудида тиббий кўрикдан ўтказишни ташкил этиш учун тиббий асбоб-ускуналар билан Россиянинг 40 нафар тиббиёт ходими Ўзбекистонга келганди. Ишлаш учун жалб қилинаётган фуқаролар янги турдаги «Спутник Лайт» вакцинаси билан эмланади.

Номзодларни ишга жалб қилиш, тиббий кўрикдан ўтказиш, эмлаш, рус тили ва Россия қонунчилиги бўйича имтиҳон топшириш, патент расмийлаштириш ва транспорт харажатлари — иш берувчилар томонидан қопланади.