“Biz Rossiyaga qullarni jo‘natmayapmiz, yaxshi ishlarni beruvchilar bilan shartnoma qilyapmiz” — Bandlik va mehnat munosabatlari vazirligi

Rossiyada ishlamoqchi bo‘lgan o‘zbekistonliklarga qurilish sohasida 10 mingta ish o‘rni taklif etilgandi. Bandlik va mehnat munosabatlari vazirligi matbuot xizmati rahbari Mavjuda Mirzayeva 8-noyabr kuni o‘tkazilgan matbuot anjumanida bu haqda batafsil ma’lumot berdi, deb xabar bermoqda “Daryo” muxbiri.

Uning ma’lum qilishicha, O‘zbekiston fuqarolarini Rossiyada qurilish sohasida mehnat faoliyatini amalga oshirishga jalb qilish bo‘yicha pilot loyihasi doirasida kasbiy tanlov o‘tkazilmoqda.

“Agar qonuniy yo‘l bilan ishlash uchun ketgan bo‘lsa, Bandlik va mehnat munosabatlari vazirligi har doim ularning huquqini hamma joyda himoya qila olamiz. Agar noqonuniy, aylanma yo‘llar bilan ketib, hujjatsiz faoliyat yuritadigan bo‘lsa, bizning vazirlik hech qanday yordam bera olmaydi, afsuski. Biz qullarni jo‘natmayapmiz. Yaxshi ishlarni beruvchilar bilan shartnoma qilyapmiz va shu asosida fuqarolarimiz qanday sharoitda, qanday oylik olishi doimiy ravishda nazorat qilib boriladi”, — deydi Mavjuda Mirzayeva.

Ishlash istagini bildirgan O‘zbekiston fuqarolariga tibbiy ko‘rikdan o‘tish, emlash, rus tili, Rossiya tarixi va qonunchiligi bo‘yicha imtihon topshirish, patent rasmiylashtirish va transport xarajatlari ish beruvchi tomonidan qoplab berilishi qayd etildi.

Ma’lumot uchun, 2021-yilning sentabrida Rossiya mehnat va ijtimoiy himoya vaziri o‘rinbosari A.Pudov boshchiligida qator davlat tashkilotlari va yirik ish beruvchi korxonalar vakillaridan iborat delegatsiyaning O‘zbekistonga tashrifi doirasida mehnat migratsiyasi masalalariga bag‘ishlangan muzokaralar o‘tkazilgandi. Unda qurilish sohasida mehnat faoliyatini amalga oshirish uchun 10 ming fuqaroni yaqin vaqt davomida soddalashtirilgan tartib asosida O‘zbekistondan Rossiyaga ishga jalb qilishga kelishilgan edi.

Mazkur fuqarolarni tashkiliy tarzda ishga jo‘natish loyihasi doirasida ularni mamlakat hududida tibbiy ko‘rikdan o‘tkazishni tashkil etish uchun tibbiy asbob-uskunalar bilan Rossiyaning 40 nafar tibbiyot xodimi O‘zbekistonga kelgandi. Ishlash uchun jalb qilinayotgan fuqarolar yangi turdagi “Sputnik Layt” vaksinasi bilan emlanadi.

Nomzodlarni ishga jalb qilish, tibbiy ko‘rikdan o‘tkazish, emlash, rus tili va Rossiya qonunchiligi bo‘yicha imtihon topshirish, patent rasmiylashtirish va transport xarajatlari — ish beruvchilar tomonidan qoplanadi.