Карим Бензема — Европанинг айни дамдаги энг яхши футболчиси. У жорий мавсумда «Ювентус» ва «Арсенал»дан кўпроқ, «Барселона» билан эса бир хил гол урди

«Реал» ҳужумчиси Карим Бензема айни пайтда Европанинг энг яхши футболчиси бўлиб турибди. Франциялик ҳужумчи Ла Лиганинг 6-туридан ўрин олган «Мальорка»га қарши ўйинда жамоасининг 4 та (2 та гол ва 2 голли узатма) голида қатнашди ва «гол+пас» тизимида 15 очко тўплаб, топ-5 лигаларнинг XXI асрдаги рекордини янгилади. Мавсум бошидаги олтита турда ҳали ҳеч қайси футболчи бунчалик кўп голда қатнашмаган. Бенземанинг ҳисобида ҳозирда 8 та гол ва 7 та голли узатма бор. Ақл бовар қилмас кўрсаткич, шундай эмасми, аммо бу рақамлар бошқалари билан солиштирилиб кўрилганда янада «жозибалироқ» кўринади.

Мисол учун, Ла Лига тарихида 6-турдан сўнг «гол+пас» тизими бўйича энг яхши кўрсаткич қайд этган футболчилар келтирилади:

• Карим Бензема (2021/22 йилги мавсум) — 15 (8 гол, 7 та голли узатма);
• Криштиану Роналду (2014/15 йилги мавсум) — 14 (13 та гол, 1 та голли узатма);
• Лионель Месси (2011/12 йилги мавсум) — 13 (8 та гол, 5 та голли узатма).

33 ёшли Каримнинг натижасини тўлиқ англаб етиш учун, унинг 29 ёшли Роналду ва 24 ёшли Мессини ортда қолдирганини кўрсатиш кифоя қилса керак.

Бундан ташқари, Бензема ушбу мавсумда баъзи клублардан ҳам кўпроқ гол урди:

• «Ювентус» — 7 та;
• «Тоттенҳэм» — 3 та;
• «Арсенал» — 2 та;
• «Барселона» эса Бензема билан бир хил кўрсаткич қайд этган — 8 та.

Умуман олганда, Каримнинг ёши (у декабрда 34 ёшга тўлади) — унчалик ҳам машҳур бўлмаган мавзу ҳисобланади. Одатда 30 ёшдан кейин Роналду, Златан Ибраҳимович ва Антонио ди Натале каби футболчиларнинг зўр ўйнаётгани ҳақида гапирилади, аммо Бензема деярли ҳеч қачон «йиллар ўтгани сари яхшиланиб бормоқда» клуби аъзолари қаторида тилга олинмаган.

Мисол тариқасида, бир қанча жаҳон даражасидаги юлдузлар Бенземанинг ёшида гранд клублар сафида ўйнамаган ҳам:

• Робин ван Перси 33 ёшида «Фенербаҳче»да ўйнаган;
• Фернандо Торрес 33 ёшида «Атлетико»да фаолиятини якунлаш ҳақида ўйлаётганди;
• Уэйн Руни 33 ёшда MLS’да тўп сурган.

Шу билан бирга алоҳида таъкидлаш керак бўлган яна бир жиҳат бор, Бензема тез-тез жароҳат олиб туради. Узоқ муддатга сафдан чиқарадиган даражада бўлмаса-да, лекин жуда кўп маротаба турли хил майда шикастланишлар бўлган. Ушбу жароҳатлар туфайли (Transfermarkt маълумотларига кўра) Бензема 2011 йилдан бери 54 ўйинни ўтказиб юборган. Ўйинлар сонини инобатга олиб айтганда, буни бир мавсумга тенглаштириш мумкин.

Бензема ҳақида гап кетганда яна бир муҳим жиҳат бор — бу унинг унинг кўп йиллар Роналду билан бирга ўйнагани. Кўпчилик Каримни Роналдунинг самарадорлиги учун унинг соясида қолиб кетган деб ҳисоблайди.

Ушбу фикрлар қанчалик асосли эканлигини текшириш учун Бенземанинг Роналду билан бирга ўйнаган мавсумлардаги статистикасига мурожаат қилиш керак бўлади (фақат Ла Лига):

• 2009/10 йилги мавсум — 27 ўйин, 8 та гол, 5 та голли узатма (дебют мавсум);
• 2010/11 — 33 ўйин, 15 та гол, 6 та голли узатма;
• 11/12 — 34 ўйин, 21 та гол, 11 та голли узатма;
• 12/13 — 30 ўйин, 11 та гол, 13 та голли узатма;
• 13/14 — 35 ўйин, 17 та гол, 10 та голли узатма;
• 14/15 — 29 ўйин, 15 та гол, 11 та голли узатма;
• 15/16 — 27 ўйин, 24 та гол, 8 та голли узатма;
• 16/17 — 29 ўйин, 11 та гол, 5 та голли узатма;
• 17/18 — 32 ўйин, 5 та гол, 11 та голли узатма.

Кўриш мумкинки, Бенземанинг «Реал»даги энг сермаҳсул мавсуми Роналду билан бирга ўйнаган вақтга тўғри келади — 2015/16 йилги мавсумда 32 та самарали ҳаракат.

Карим ҳали ҳам ушбу натижасини янгилай олганича йўқ. У ўтган мавсумда буни такрорлади (23+9), аммо 7 та кўпроқ ўйин ўтказган ҳолда.

Роналдунинг гол уриш борасидаги худбинлиги қурбони сифатида кўриладиган футболчи учун бу ёмон статистика эмас. Агар Бензема шу кетишда давом этса, «Реал»даги натижасини такрорлайди, балки «Олтин бутси» ва «Олтин тўп» учун ҳам курашиши мумкин.