19 сентябрь куни Испаниянинг Атлантика океанидаги Канар архипелаги таркибига кирувчи Палма оролида Кумбре-Веха вулқон тизмаси отилишни бошлади. Ушбу вулқонлар занжири сўнгги марта 1971 йилда отилган.

Палма оролидаги Кумбре-Веха миллий боғида вулқон отилишидан кейинги лава ва тутун. 19 сентябрь, 2021 йил

Фото: Reuters

Вулқонда янги отилиш сейсмик фаоллик ошганидан кейин юз берган — 11 сентябрдан кейин бу ҳудудда бир ҳафта мобайнида 22 мингта ерости силкиниши қайд этилган. Вулқон отилишидан  олдин 3,8 магнитудали зилзила содир бўлган. Табиий офат жойидан олинган видеолавҳаларда вулқондан осмонга лавалар, кул ва тошлар отилганини кўриш мумкин. Лава оқимларидан бири ёнбағирдаги энг яқин уйлар томон оққан. Палма оролидан олинган лавҳаларни маҳаллий RТВC телеканали эфирга узатмоқда.

Фото: Getty Images

Вулқон отилишидан бироз олдинроқ яқин атрофдаги қишлоқлар аҳолисини эвакуация қилиш бошланган, бу ҳудуддан жами мингга яқин одам эвакуация қилиниши керак. Уй ҳайвонлари ҳам эвакуация қилинмоқда. Испания Мудофаа вазирининг сўзларига кўра, эвакуацияни амалга оширишда ҳарбийлар ёрдам берган.

Вулқоншунос Ставрос Мелетидеснинг Reuters агентлигига айтишича, вулқон ёнбағрида бешта ёриқ пайдо бўлган, айни пайтда ҳеч ким унинг қанча давом этишини айта олмайди. Ҳозирча қурбонлар ҳақида ҳеч қандай маълумот йўқ, лекин орол маъмурлари бир нечта йўллар шикастлангани ҳақида хабар берган.

Фото: Getty Images

Фото: EPA

Фото: Reuters