Сирдарёда Nexia пиёдани уриб, воқеа жойидан қочиб кетди. Жабрланувчи ҳодиса жойида вафот этди

Сирдарёда пиёдани уриб, воқеа жойидан яширинган ҳайдовчи ушланди, дея хабар қилмоқда ИИВ ахборот хизмати.

Маълум қилинишича, 2021 йил 3 сентябрь куни соат 00:10 ларда Ховос тумани «Соҳибкор» маҳалласи ҳудудидан ўтувчи А-376 автомобиль йўлининг 205-километрида Қўқон–Жиззах йўналишида ҳаракатланиб кетаётган кул ранг Nexia-2 русумли автомашина Ховос тумани «Соҳибкор» маҳалласи ҳудудида жойлашган карер ишчисини автоуловнинг олди қисми билан уриб юбориб, ЙТҲ содир этган ҳамда воқеа жойидан қочиб кетиб яширинган.

Оқибатда пиёда олган тан жароҳатларининг оғирлигидан воқеа жойида вафот этган.

Ички ишлар органлари ходимлари томонидан олиб борилган тезкор қидирув-суриштирув давомида ушбу йўл-транспорт ҳодисасини содир этган ҳайдовчи ушланди.

Ҳозирда дастлабки тергов ҳаракатлари олиб борилмоқда.