Ижтимоий тармоқларда Қарши шаҳрида яшовчи 18 ёшли қиз беш ой давомида зўрлаб келингани сабаб ўз жонига қасд қилганига оид видеолавҳа тарқалди. Вилоят ИИБ ахборот хизматининг маълум қилишича, ҳозирда ушбу ҳолат бўйича суриштирув олиб борилмоқда.
Видеолавҳада айтилишича, шаҳарнинг «Қавали» маҳалласида яшовчи 18 ёшли Ш.Ж. исмли қиз Шаҳзод Қ. томонидан 2020 йил октябридан 2021 йилнинг 1 февралига қадар зўрлаб келинган. Шаҳзод Қ. қизнинг номусига тегган вақтида олган суратлари билан уни шарманда қилиш билан қўрқитиб, мажбуран жинсий алоқа қилиб келган.
Жабрланувчи ота-онасининг сўзларига кўра, қизи ўзини икки марта ўлдирмоқчи бўлган. У 12 дона уйқу ва бошқа дориларни ичиб юборган, ўзини осмоқчи бўлганида эса отаси қайтариб қолган.
Қашқадарё вилояти ИИБнинг маълумотларига кўра, ҳолатга ойдинлик киритиш мақсадида Ш.Ж.га нисбатан бир неча бор судга оид тиббиёт экспертизаси тайинланиб, экспертиза хулосалари олинган.
Терговга қадар текшириш натижасига кўра, Қарши шаҳар ИИО ФМБ 3-сонли ИИБ ҳузуридаги Тергов бўлими суриштирувчиси томонидан Шаҳзод Қ.нинг ҳаракатларида жиноят аломатлари йўқ деб топилиб, тўпланган ҳужжатларга асосан Жиноят-процессуал кодексининг 83-моддаси (реабилитация учун асослар) 2-банди тартибида жиноят иши қўзғатишни рад этиш тўғрисида қарор қабул қилинган ва натижаси аризачига алоқа хати орқали ёзма маълум қилинган.
Таъкидланишича, ҳозирда ҳолат бўйича суриштирув олиб борилмоқда.
Бундан аввал Бухорода 14 ёшли қизни зўрлаб келган чўпон 3 йилга озодликдан маҳрум қилингани, Навоийда мактаб ўқувчиси ҳомиладор бўлиб қолгани ҳамда Тошкент вилоятида 14 ёшли қизнинг номусига тегганликда гумонланаётган шахс қамоққа олингани ҳақида хабар берилганди.
Изоҳ (0)