АОКАда бўлиб ўтган брифингда Коронавирусга қарши курашиш штаби аъзоси Севара Убайдуллаева вакцинация бўйича аҳоли саволларига жавоб берди.
Фото: «Дарё» / Мадина Нурман
– Мен ҳомиладор бўлишни режалаштиряпман, сизлар вакцина олиш ҳомиладорликка таъсир қилмайди деяпсизлар. Маҳалламиздаги келин вакцинациядан кейин 3 ойлик ҳомиласини олдирди. Ҳолатга изоҳ берсангиз.
«Вакцинация аслида инсон организмида ташқаридан тушадиган ёт инфекцияга қарши ҳимоя антитана ишлаб чиқиш учун организмга юбориладиган дори воситаси. У организмга кириши билан организмда иммунитет аъзолари ва ҳужайраларига таъсир кўрсатади.
Вакцина ҳомиладорларда клиник тадқиқотдан ўтказилмаган. Вакцина ҳомила ривожланишига таъсир кўрсатиши ёки йўқлиги ҳақида асосли маълумотлар мавжуд эмас. Ҳомиласини олдирган келинчак ҳолати эса чуқур ўрганишни талаб этади, чунки вакцинадан олдин онанинг саломатлиги, ёши, ташқи таъсирлар ҳам болани ривожланмаслигига ва ҳомилада нуқсонлар пайдо бўлишига олиб келади.
Бундай ҳолатлар вакцинагача ҳам бор эди, айнан бир келинчак ҳолатини вакцина билан боғлаш нотўғри, уни ўрганиб чиқилгандан кейин тўғри фикр ва хулоса чиқариш мумкин», – деди Севара Убайдуллаева.
Бундан аввал вакцина олган аёллар уч йилгача фарзанд кўра олмаслиги ҳақидаги хабарларга ойдинлик киритилгани ҳамда ЖССТ эмизикли оналарга COVID-19 га қарши эмланишни тавсия қилгани ҳақида хабар берилганди.
