Фарғона, Наманган ва Сурхондарё вилоятида ер майдонларини ноқонуний равишда ўзгага сотаётган шахслар аниқланди, дея хабар бермоқда ДХХ матбуот хизмати.

ДХХ ҳамда иқтисодий жиноятларга қарши курашиш департаментининг Фарғона вилояти бошқармалари томонидан ўтказилган тезкор тадбирда, Бешариқ туманидаги фермер хўжаликларидан бирининг раҳбари Бешариқ туман ҳокимининг қарори билан қишлоқ хўжалиги маҳсулотларини етиштириш учун турмуш ўртоғи раҳбарлигидаги деҳқон хўжалигига ажратилган ва тумандаги «Тошариқ» маҳалласида жойлашган 35 сотих ер майдонини 29 минг АҚШ долларига сотишга келишиб, олдиндан 20 минг АҚШ долларини олган вақтда ушланди.

ДХХ Фарғона вилояти бошқармаси ва иқтисодий жиноятларга қарши курашиш департаментининг ҳудудий бошқармаси ходимлари ҳамкорлигида тезкор тадбирда ўтказилган. Олтиариқ туманидаги Қапчуғай қишлоғида жойлашган 20 сотих бўш ер майдонини фирибгарлик йўли билан 30 минг АҚШ долларига сотишни ва ҳужжатларни фуқаронинг номига расмийлаштириб беришни ваъда қилиб, келишилган маблағдан 15 минг АҚШ долларини олган мансабдор шахс қўлга олинган.

Яна бир ҳолатда, Боғдод туманида яшовчи фуқаро бошқа бир шахс раҳбарлигидаги деҳқон хўжалигига қарашли 4,75 гектар ер майдонини мижозга 11 минг АҚШ доллари эвазига сотишга келишиб, ҳужжатларни унинг номига расмийлаштириб беришни ваъда қилади. ДХХ ҳамда департаментнинг Фарғона вилояти бошқармалари ходимлари томонидан ўтказилган тезкор тадбир давомида ушбу фуқаро фирибгарлик йўли билан 11 минг АҚШ долларини олган вақтда ашёвий далиллар билан ушланди.

Бундан ташқари ДХХ Наманган вилояти бошқармаси иқтисодий жиноятларга қарши курашиш департаментининг Чортоқ туман ходимлари билан ҳамкорликда ўтказилган тезкор тадбирда, Чортоқ туманидаги МЧЖдан бирига қарашли 8 гектар ер майдонини боғдорчилик учун ажратиб, туман ҳокими қарорини танишлари орқали расмийлаштириб бериш эвазига мижоздан 7 минг АҚШ доллари ва 31,5 миллион сўм олмоқчи бўлган фуқаро ушланди.

ДХХ Сурхондарё вилояти бошқармаси ва иқтисодий жиноятларга қарши курашиш департаментининг ҳудудий бошқармалари ходимлари томонидан ўтказилган тезкор тадбир давомида, ўзини Бандихон туманидаги фермер хўжалиги раҳбари деб таништириб, Давлат захирасида бўлган ер майдонидан 2 гектарини 50 миллион сўмга сотишини ҳамда ушбу ер ҳужжатларини туман ҳокимиятида ишловчи танишига 50 миллион сўм бериб ҳужжат қилиб беришини ваъда қилиб, жами 100 миллион сўм сўрайди ва ушбу пулни олган вақтида ашёвий далиллар билан ушланди.

Ҳозирда ушбу шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.

Бундан аввал Сирдарёда ҳокимлик захирасидаги 14 гектар ерни 30 минг доллар эвазига расмийлаштириб беришга уринган ота-бола аниқлангани, Фарғонада 50 сотих ерни 25 минг долларга ноқонуний сотмоқчи бўлган МЧЖ бошлиғи ушлангани ҳамда ДХХ Бўстонлиқда от спортига ажратилган 25,4 гектар ерни 1,5 млн долларга сотмоқчи бўлган шахсни қўлга олингани ҳақида хабар берилганди.