Ўзбекистонга октябрь ойида комфорт нуқтаи назаридан янада юқорироқ бўлган иккита вертолёт олиб келинади. Бу ҳақда 31 июль куни «Ўзбекистон ҳаво йўллари» авиакомпаниясида H-125 вертолётининг тақдимот маросимида бош вазир ўринбосари Азиз Абдуҳакимов маълум қилди, дея хабар бермоқда «Дарё» мухбири Мусулмонбек Иброҳимов.
Uzbekistan Helicopters корхонасининг самолёт-таъмирлаш устахонасида фуқаролик авиацияси хизматини кўрсатишга мўлжалланган, Airbus компанияси томонидан ишлаб чиқилган иккита H-125 вeртолётининг имкониятлари ҳақида маълумот берилди.
Азиз Абдуҳакимовнинг таъкидлашича, ушбу вертолётларда маҳаллий ва хорижий туристлар Ўзбекистоннинг энг гўзал гўшалари ва тарихий шаҳарларига парвоз қилиш имкониятига эга бўлади: «Октябрь ойида тақдим этилган иккита вертолётдан ташқари комфорт нуқтаи назаридан янада юқорироқ бўлган бошқа вертолётлар ҳам олиб келинади», – деди бош вазир ўринбосари.
Абдуҳакимов туристик компанияларнинг пандемия шароитидаги қийин вазиятда ички туризмга қўшаётган хизматларини алоҳида эътироф этиб ўтди.
«Пандемия даврида – оғир даврда, албатта, қийин бўлиши мумкин. Лекин биз кўриб турибмизки, туристик компаниялар ички туризмга ўз фаолиятларини қаратмоқдалар ва бу ҳам жуда яхши имконият. Яъни бизни туристик компанияларимиз Uzbekistan Helicopters билан биргаликда ўз туристик маҳсулотлари таркибига вертолёт парвозларини ҳам қўшишса, бу аҳолимизга ва меҳмонларимизга янги хизматларни тақдим этади», – деди у.
Маълумот учун, Airbus Helicopters H-125 енгил двигателли вертолёт (собиқ Eurocopter AS350 B3) FADEC рақамли бошқарув тизимига эга кучли двигатель билан жиҳозланган. Вертолёт юқори баланд тоғ ва иссиқ иқлим шароитларда экcплутация қилишга мослашган ва ташқи илгакка осган ҳолда 1 минг 400 килограммгача бўлган юкни олиб кета олади. Шунингдек, авиатранспорт кузатув-қутқарув ишларини амалга ошириш, йирик ёнғин майдонларини ўчириш, юкни кўтариш, ҳосилни чанглатиш, электр узатиш тармоқларини юқоридан кузатиш, аэровидео тасвирга олиш, парашутда сакраш, геологик қидирув каби кенг кўламли вазифаларни бажаришда қўлланилади.
H-125 вертолёти тўла юк билан 7 минг метргача кўтарила олади. Вертолётнинг биринчи парвози (Eurocopter AS350) 1997 йилда бўлиб ўтган ва шундан буён доимий равишда такомиллаштириб келинади. Мутахассисларнинг фикрича, ушбу моделнинг асосий афзалликлари – қулайлик, тизимли мустаҳкамлик ва борт ускунасининг ишончлилигида. Авиатранспорт соaтига 287 километргача тезликка эришиб, 650 километргача парвоз қилиш имкониятига эга.
Тақдимот маросимидан сўнг ОАВ вакиллари ҳамда блогерлар 2 та Ми-8МТВ вертолётларида Тошкент—Белдирсой—Амирсой—Чимён йўналишида махсус танишув парвозини амалга оширишди. Қуйида ушбу парвоз давомида кадрларга муҳрланган манзараларни томоша қилиш мумкин.
Эслатиб ўтамиз, Ўзбекистон Airbus Helicopters компаниясидан вертолётлар сотиб олмоқчи экани ҳақида 2021 йилнинг февраль ойидаёқ хабарлар чиққан эди. Ўшанда республика ушбу ҳаво транспорт турида қатновларни йўлга қўйиш орқали мазкур йўналишда Марказий Осиё минтақаси бозорида етакчи иштирокчига айланмоқчи эканлиги, айни йўналишни ривожлантиришда хорижий давлатларнинг вертолётлар эксплуатацияси ва учувчилар учун тренинглар ўтказиш бўйича тажрибаларини ўрганиши масалалари муҳокама қилингани айтилган.
Изоҳ (0)