Ўзбекистон Президентига энг кўп қайси ҳудуд тадбиркорлари мурожаат қилаётгани ва кўпроқ қандай масалалар йўлланаётгани маълум бўлди

Президент Шавкат Мирзиёев тадбиркорлар билан очиқ мулоқот ўтказиши ва ушбу учрашувдан аввал 20—31 июль кунлари республикадаги барча ишбилармонлар ўз ташаббус ва муаммоларини давлат раҳбарига мурожаат қилиш орқали етказиш имконияти яратилгани ҳақида хабар берилган эди.

«Бизнес билан бевосита мулоқот — ишбилармонлик муҳитини яхшилашнинг энг самарали воситаси» мавзусида 30 июль куни ўтказилган матбуот анжуманида қайд этилишича, мулоқот олдидан Инвестициялар ва ташқи савдо вазирлигида тадбиркорлар мурожаати ва таклифларини қабул қилиш, уларнинг муаммоларига барҳам бериш мақсадида штаб ҳамда Call-марказ фаолияти йўлга қўйилди. Бу ҳақда «Дарё» мухбири хабар бермоқда.

«Мазкур штаб фақат бизнинг вазирлик томонидан эмас, балки Савдо-саноат палатаси, Бизнес-омбудсман ва бош вазир қабулхоналари котибияти томонидан ташкил этилди. Шу билан бирга, тегишлилиги бўйича вазирликлар, идоралар, банклар, тармоқ корхоналари ва ҳокимликлар ҳам жалб қилинган. Штаб ва Call-марказлар 24 соат давомида ишлаб турибди. Ижтимоий тармоқлар, электрон почта ва Telegram бот орқали ҳам мурожаатлар келиб тушяпти.

Шунингдек, ҳудудларда ҳам штаблар фаолияти йўлга қўйилган. Уларга ҳар бир масъул вазирлик ва идорадан 3 нафар ходим бириктирилган. Тадбиркорларнинг таклиф ва мурожаатлари 16 йўналишга тақсимланиб, ҳар бири бўйича алоҳида мониторинг олиб борилмоқда», — деди бош вазир ўринбосари, инвестициялар ва ташқи савдо вазири Сардор Умрзоқов.

Унинг таъкидлашича, штаб очилганидан бери шу кунгача тадбиркорлардан жами 7 минг 146 та мурожаат бўлган.

«Биз уларни туркумлаштирдик. Мавжуд мурожаатлардан 5 минг 783 таси индивидуал характерга эга. Яъни мана шунча тадбиркор ўз бизнес фаолиятига оид қандайдир муаммо ёки таклиф билан мурожаат қилган. Индивидуал характерга эга мурожаатлар кун давомида бош вазир қабулхоналари орқали масъул мутасаддиларга ўрганиш ва ечим топиш учун етказилмоқда. Президент билан мулоқотни кутмасдан, янги тезкор тизимни йўлга қўйдик ва натижада шу пайтгача 1 минг 757 та индивидуал тарзда тушган мурожаат ижобий ҳал этилди. Қолганлари бўйича кунлик ишлар давом этяпти.

Штаб томонидан шундай қарор қабул қилинганки, масъул ташкилотлар индивидуал тарздаги мурожаатни узоғи билан 2-3 кунда ечимини топиб, бизга ҳисоботини бериши керак. Агар мурожаат ечими ҳукумат даражасида бўлса, бизга бу бўйича аниқ таклиф ва лойиҳа ҳужжатларини киритиши лозим. Бу бўйича таъсирчан назорат ўрнатилган ва Бош прокуратура ҳам алоҳида назоратга олган. Жами мурожаатларнинг 1 минг 234 таси тизимли таклиф ва муаммолар, 129 таси эътирозлардир», — деди Умрзоқов.

Таҳлилларга кўра, энг кўп мурожаатлар қуйидаги масалаларда келиб тушган:

• бизнесни молиялаштириш, кредитлаш ва субсидиялар бўйича 3 минг 65 та;
• бизнесни бошлаш юзасидан ғоялар 343 та;
• ер ва бино ажратиш билан боғлиқ 1 минг 303 та;
•  турли рухсатнома ва сертификатлар олиш билан боғлиқ 254;
• муҳандислик-коммуникация инфратузилмаси 230 та;
• хусусий мулкни ҳимоя қилиш бўйича 183 та;
• имтиёз ва преференциялар 174 та;
• хусусийлаштириш бўйича 154 та;
• давлат бошқарув органлари фаолияти ва уларнинг иқтисодиётга аралашуви 147 та;
• қурилиш соҳаси 103 та;

Ҳудудлар кесимида мурожаатлар сони кўплиги бўйича Тошкент шаҳри (693 та), Тошкент вилояти (673 та), Қашқадарё вилояти (638 та), Сурхондарё вилояти (635 та) ва Самарқанд вилояти (624 та) етакчилик қилмоқда.