Prezident Shavkat Mirziyoyev tadbirkorlar bilan ochiq muloqot o‘tkazishi va ushbu uchrashuvdan avval 20—31-iyul kunlari respublikadagi barcha ishbilarmonlar o‘z tashabbus va muammolarini davlat rahbariga murojaat qilish orqali yetkazish imkoniyati yaratilgani haqida xabar berilgan edi.
“Biznes bilan bevosita muloqot — ishbilarmonlik muhitini yaxshilashning eng samarali vositasi” mavzusida 30-iyul kuni o‘tkazilgan matbuot anjumanida qayd etilishicha, muloqot oldidan Investitsiyalar va tashqi savdo vazirligida tadbirkorlar murojaati va takliflarini qabul qilish, ularning muammolariga barham berish maqsadida shtab hamda Call-markaz faoliyati yo‘lga qo‘yildi. Bu haqda “Daryo” muxbiri xabar bermoqda.
“Mazkur shtab faqat bizning vazirlik tomonidan emas, balki Savdo-sanoat palatasi, Biznes-ombudsman va bosh vazir qabulxonalari kotibiyati tomonidan tashkil etildi. Shu bilan birga, tegishliligi bo‘yicha vazirliklar, idoralar, banklar, tarmoq korxonalari va hokimliklar ham jalb qilingan. Shtab va Call-markazlar 24 soat davomida ishlab turibdi. Ijtimoiy tarmoqlar, elektron pochta va Telegram bot orqali ham murojaatlar kelib tushyapti.
Shuningdek, hududlarda ham shtablar faoliyati yo‘lga qo‘yilgan. Ularga har bir mas’ul vazirlik va idoradan 3 nafar xodim biriktirilgan. Tadbirkorlarning taklif va murojaatlari 16 yo‘nalishga taqsimlanib, har biri bo‘yicha alohida monitoring olib borilmoqda”, — dedi bosh vazir o‘rinbosari, investitsiyalar va tashqi savdo vaziri Sardor Umrzoqov.
Uning ta’kidlashicha, shtab ochilganidan beri shu kungacha tadbirkorlardan jami 7 ming 146 ta murojaat bo‘lgan.
“Biz ularni turkumlashtirdik. Mavjud murojaatlardan 5 ming 783 tasi individual xarakterga ega. Ya’ni mana shuncha tadbirkor o‘z biznes faoliyatiga oid qandaydir muammo yoki taklif bilan murojaat qilgan. Individual xarakterga ega murojaatlar kun davomida bosh vazir qabulxonalari orqali mas’ul mutasaddilarga o‘rganish va yechim topish uchun yetkazilmoqda. Prezident bilan muloqotni kutmasdan, yangi tezkor tizimni yo‘lga qo‘ydik va natijada shu paytgacha 1 ming 757 ta individual tarzda tushgan murojaat ijobiy hal etildi. Qolganlari bo‘yicha kunlik ishlar davom etyapti.
Shtab tomonidan shunday qaror qabul qilinganki, mas’ul tashkilotlar individual tarzdagi murojaatni uzog‘i bilan 2-3 kunda yechimini topib, bizga hisobotini berishi kerak. Agar murojaat yechimi hukumat darajasida bo‘lsa, bizga bu bo‘yicha aniq taklif va loyiha hujjatlarini kiritishi lozim. Bu bo‘yicha ta’sirchan nazorat o‘rnatilgan va Bosh prokuratura ham alohida nazoratga olgan. Jami murojaatlarning 1 ming 234 tasi tizimli taklif va muammolar, 129 tasi e’tirozlardir”, — dedi Umrzoqov.
Tahlillarga ko‘ra, eng ko‘p murojaatlar quyidagi masalalarda kelib tushgan:
- biznesni moliyalashtirish, kreditlash va subsidiyalar bo‘yicha 3 ming 65 ta;
- biznesni boshlash yuzasidan g‘oyalar 343 ta;
- yer va bino ajratish bilan bog‘liq 1 ming 303 ta;
- turli ruxsatnoma va sertifikatlar olish bilan bog‘liq 254;
- muhandislik-kommunikatsiya infratuzilmasi 230 ta;
- xususiy mulkni himoya qilish bo‘yicha 183 ta;
- imtiyoz va preferensiyalar 174 ta;
- xususiylashtirish bo‘yicha 154 ta;
- davlat boshqaruv organlari faoliyati va ularning iqtisodiyotga aralashuvi 147 ta;
- qurilish sohasi 103 ta;
Izoh (0)