eBay онлайн савдо майдончаси орқали лимузинга айлантирилган Ferrari 360 Modena спорткари сотувга қўйилди, деб хабар беради Motor. Машинанинг «чайка қанотлари» деб аталувчи кўтарма эшиклари пайдо бўлган, салонига эса саккиз киши сиғади.

Фото: eBay

Лимузин асосини 2001 йилда ишлаб чиқарилган Ferrari 360 Modena ташкил этади. Эълонда кўрсатилишича, автомобиль 3,4 литрли мотор билан жиҳозланган, бироқ бу хатолик бўлиши керак, чунки 360-моделларнинг барчасига 400 от кучига эга 3,6 литрли V8 ўрнатилган.

Фото: eBay

Икки ўриндиқли суперкар қандай қилиб саккиз ўриндиқли лимузинга айлантирилгани ҳақида ҳеч қандай маълумот берилмаган. Сотувчининг таъкидлашича, машина ичига саккизта ўриндиқ жойлаштирилган, бироқ эълонда интерьер сурати келтирилмаган.

Фото: eBay

Ҳозирда лимузин Буюк Британияда. Сотувчининг сўзларига кўра, машина нафақат юлдузлар ва VIP-мижозлар орасида, балки автосалонлар ва «Формула-1» пойгалари ташкилотчилари, шунингдек, кино саноати вакиллари орасида жуда машҳур. Машина эгаси янги харидорга автомобилни дунёнинг исталган нуқтасига етказиб бера олишини маълум қилган. Бундан ташқари, у бонус сифатида ноодатий Ferrari’га қўшиб унинг ижарасига қизиқувчиларнинг контактларига оид маълумотларни ҳам беришга тайёр.

Фото: eBay

Савдолар 24 июль куни якунланади. Ҳозирда Ferrari базасидаги лимузин учун 145 минг фунт таклиф этилмоқда.

Аввалроқ Германияда 40 йил гаражда сақланган «ГАЗ» лимузини 25 минг еврога сотилаётгани, АҚШда «Чўқинтирган ота» фильмидаги Cadillac лимузини аукционга қўйилгани тўғрисида хабар берилганди.