Футбол бўйича Ўзбекистон Суперлигасининг 12-тури доирасида кечган «Насаф» — «Сўғдиёна» учрашувида (1:0) ҳар икки жамоа вакиллари ўртасида тортишувга вазият юзага келди.

Учрашув якунланиши арафасида меҳмонлар «Насаф» футболчисига нисбатан қўпол ҳаракат қилди. Натижада бу оммавий тортишувга айланиб кетди. Вазиятга ҳуқуқни муҳофаза қилиш органлари ходимлари аралашди ва бироз муддатдан кейин ҳолат юмшади. Ҳакам видеотакрорлар ёрдамида уч нафар футболчига қизил карточка кўрсатди. Жанжал келтириб чиқарган Жамшид Болтабоев («Сўғдиёна») ва Шерзод Насруллаев («Насаф») тўғридан-тўғри қизил карточкага лойиқ кўрилган бўлса, Ҳусниддин Алиқулов («Насаф») иккинчи огоҳлантиришни олиб четлатилди.

Қайд этиш керак, бош ҳакам Шавкат Насибуллаев бу вазиятдан сал аввал «Сўғдиёна»нинг голини бекор қилганди. Ҳакам видеотакрорлардан кейин ҳужум вақтида қоида бузилиши юзага келганини қайд этди ва голни инобатга олмаганди.

Эслатиб ўтамиз, Шавкат Насибуллаев 2020 йилнинг декабрь ойида «Нефтчи» ва «Турон» ўртасидаги Про-Лиганинг сўнгги тур ўйинида фаолият олиб борганди. Бу учрашув сўнгида ҳакамларга нисбатан «Нефтчи» футболчилари ва мухлислари томонидан тажовузкор ҳаракатлар амалга оширилганди. Натижада бир нечта кишига жиноий иш қўзғатилган, Насибуллаевга оёқ билан зарба берган Жамшид Тўрақулов 10 йилга футболга оид ҳар қандай фаолиятдан четлатилган, «Нефтчи» эса 100 миллион сўм жаримага тортилганди.

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!