Ўзбекистон Президенти Шавкат Мирзиёев ҳудудлардаги ўзгаришлар, аҳоли ҳаёти билан яқиндан танишиш мақсадида Андижон вилоятига жўнаб кетганди. Президент матбуот хизматининг хабар беришича, давлат раҳбари сафарини Избоскан туманининг энг чекка ҳудудлардан бири — «Қўғай» маҳалласидан бошлади.
Фото: Президент матбуот хизмати
Қайд этилишича, яқинда ушбу маҳаллада «Соҳиб омад баракаси» кластери томонидан And gold тикув-трикотаж корхонаси ишга туширилди. Президент ушбу фабрика фаолияти билан танишди.
Қиймати 2,5 миллион доллар бўлган лойиҳа доирасида янги бино қурилиб, замонавий ускуналар келтириб ўрнатилган. Корхона йилига 3,5 миллион дона тайёр трикотаж ишлаб чиқариш қувватига эга. Маҳсулотларни 100 фоиз экспортга йўналтириш режалаштирилган. Бу борадаги йиллик имконият 5 миллион доллардан зиёд. Калава ип етказиб бериш бўйича Хитой ва Россия билан шартнома тузилган.
Фото: Президент матбуот хизмати
Корхонада айни пайтда 830 нафар хотин-қиз ишламоқда. Президент улар билан суҳбатлашди.
«Сизларга ўзимнинг ҳурматимни, муҳаббатимни билдираман. Ўзларингиз яшайдиган қишлоқда ишли бўлганларингиздан хурсандман. Қачон Избосканда мана шундай замонавий корхона бўлган? Бу ишларни яна давом эттирамиз. Хотин-қизларимиз учун ҳамма шароитларни яратамиз. Аёл ишли бўлиб, кайфияти яхши бўлса, оиласи ҳам бахтли бўлади», — деган Шавкат Мирзиёев.
Фото: Президент матбуот хизмати
Хабарда таъкидланишича, фабрика тўла қувватга чиққанда чекка ҳудуддаги 1 минг 200 нафар киши доимий иш билан таъминланади.
Шу ерда Андижон вилоятида саноат тармоқларини ривожлантириш чора-тадбирлари тақдимот қилинган.
Президентнинг икки кунлик амалий ташриф давомида тўқимачилик корхонасидан ташқари, агросаноат ва қишлоқ хўжалиги корхоналари фаолияти билан танишиш, бунёдкорлик ишларини кўздан кечириш режалаштирилган. «Янги Андижон» шаҳарчаси қурилишининг бошланиши ташрифнинг энг муҳим воқеаларидан бири бўлади.
Эслатиб ўтамиз, Ўзбекистон Президентининг Андижон вилоятига бундан олдинги ташрифи 2020 йилнинг майида амалга оширилган эди. Ўшанда давлат раҳбари Андижон шаҳрида қурилган 7 ва 16 қаватли янги уйларни бориб кўрган, вилоятда ғўза қатор ораларига соя экиш бўйича топшириқ берган эди.
