Тошкентда сержантлар тайёрлаш мактабига 12 минг долларга ўқишга киритиб қўймоқчи бўлганлар ушланди

Тошкентда сержантлар тайёрлаш мактабига пул эвазига ўқишга киритиб қўймоқчи бўлган шахслар қўлга олинди. Бу ҳақда Бош прокуратураси ҳузуридаги Иқтисодий жиноятларга қарши курашиш департаменти хабар берди.

Маълум қилинишича, фуқаро А.Н. ва Д.Н. олдиндан тил бириктириб, юқори лавозимда ишловчи танишлари орқали фуқаро Ж.ни ИИВ академияси қошидаги Сержантлар тайёрлаш мактабига ўқишга киритиб қўйиш масаласини 12 минг долларга ҳал қилиб беришга келишган.

Шундан 6 минг долларни фирибгарлик йўли билан олган вақтида департамент, ДХХ ҳамда ИИБнинг Юнусобод тумани бўлимлари томонидан ўтказилган тезкор тадбирда ашёвий далиллар билан ушланган.

Ҳолат юзасидан Жиноят кодексининг 168-моддаси (фирибгарлик) ва 28-, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

Аввалроқ Гулистон давлат университетига ўқишга киритиб қўйиш учун 3 кишидан 6,4 минг доллар пул олган шахслар қўлга олингани, Тошкент давлат юридик университетига киритиб қўйиш учун 10 минг доллар сўраган шахс ушлангани ҳақида хабар берилган эди.