Тошкентда чиқиндиларни саралаб йиғиш мақсадида рангли пакетларни тарқатиш бошланади

Тошкентда 16 июндан бошлаб чиқиндиларни саралаб йиғиш учун рангли пакетларни тарқатиш бошланади. Махсус ёрлиқ ёпиштирилган машиналар 2021 йил 1 июлдан бошлаб янги жадвал бўйича ишлашни бошлайди. Бу ҳақда пойтахт ҳокимлигига таяниб, «Подробно» хабар берди.

Лойиҳани 2021 йилдан бошлаб уч йил давомида жорий этиш режалаштирилмоқда.

Қаттиқ маиший чиқиндиларни саралаб йиғиш тизими қуйидаги тартибда босқичма-босқич амалга оширилади:

• биринчи босқичда (2021 йил) — Тошкент ҳокимлиги томонидан рўйхати тузилган 24 та маҳалла ҳудудида (ҳар бир туманда иккитадан) чиқиндиларни «қайта ишланувчи», «қайта ишланмайдиган» ва «органик» тоифаларга бўлинган ҳолда йиғиш;
• иккинчи босқичда (2022 йил) — «Махсустранс» давлат унитар корхонаси хизмат кўрсатувчи барча турдаги индивидуал турар жой секторлари ҳудудида қаттиқ маиший чиқиндиларни «қайта ишланувчи», «қайта ишланмайдиган» ва «органик» тоифаларга бўлинган ҳолда йиғиш;
• учинчи босқичда (2023 йил) — барча туманларда чиқиндиларни «қайта ишланувчи», «қайта ишланмайдиган», «органик», «хавфли маиший чиқиндилар» ва бошқа тоифаларга бўлган ҳолда йиғиш.

«Аҳолиси 2,3 миллион кишидан ошадиган Тошкент каби шаҳарда чиқиндиларни саралаб йиғишни жорий этиш озон вазифа эмас. Маиший чиқиндиларни ажратишга шаҳарнинг бутун аҳолисини ҳам жалб этиш керак. Дастурнинг узоқ муддатли ташкилий ва молиявий барқарорлиги шаҳар фаровонлиги учун жуда муҳим. ‘Махсустранс’ ДУК барқарор дастурни ишга туширишда айнан шу каби вазифани ўз олдига мақсад қилиб қўйган», — дейилади ҳокимлик хабарида.

Эслатиб ўтамиз, 2019 йилда Тошкент шаҳридаги маиший чиқиндилар ташланадиган Оҳангарон туманидаги полигон 98 фоизга тўлгани маълум қилинганди. Сенатор Баҳодир Тўйчиев Ўзбекистонда 2028 йилгача чиқиндиларни тўплаш ва олиб чиқиб кетиш хизматини барча ҳудудларда 100 фоизга етказиш режалаштирилганини айтганди.