Артритдан ҳимоя қилишга ёрдам берадиган оддий одатлар

Ер юзидаги ҳар тўртинчи ёши катта инсон артритдан азоб чекади. Ва афсуски, ушбу касаллик қурбонларининг аксарияти аёллардир. Ҳомиладорлик ва туғруқ вақтида ҳаракатга келган суяк ва бўғимларда ёш ўтгач оғриқ кузатилади. Бундан ташқари, менопауза даврида ҳам артрит хавфи ортади: бу вақт ичида нафақат кальцийни, балки соғлом бўғимлар учун зарур бўлган эстроген ҳам йўқотилади. Яхшиямки, бўғимларни ҳимоя қилишга ва касаллик хавфини камайтиришга ёрдам берадиган оддий одатлар мавжуд.

Вазнни назорат қилиш

Биринчи вазифа вазнни назорат қилишдир. Афсуски, қўшимча килограмм бўғимларга қўшимча равишда зўриқиш юклайди. Тизза ва сонларнинг ишдан чиқишини тезлаштиради. Шифокорлар шунинг учун ҳам ортиқча вазнли одамларда остеоартрит хавфи 4,7 баравар юқорилигидан огоҳлантирмоқда.

Кўк чой ичиш

Кучли антиоксидантга бой бўлган кўк чой барглари яллиғланишга қарши таъсирга эга. У суяк ва бўғимлар саломатлиги учун ёрдам беради. Ва кўк чой энг кам ферментацияга учраганлиги сабабли ўзида энг фойдали антиоксидантларни сақлайди. Шунинг учун ҳар куни камида бир стакан кўк чой ичишга одатланиш лозим.

Иш пайтида танаффус қилиш

Агар иш фаолияти ҳаракатни талаб этмаса, артрит хавфи янада кўпроқ бўлиши мумкин. Буни бартараф этиш учун ҳар соатда қисқа танаффус қилиш ва жисмоний машғулот билан шуғулланиш лозим. Бўйинни машқ қилиш, танадаги барча суякларни ҳаракатга келтириш тавсия этилади. Ушбу оддий одат артритдан ҳимоя қилишдан ташқари, концентрацияни оширишга ва ҳатто кайфиятни яхшилашга ёрдам беради.

Югуриш билан шуғулланиш

Ҳа, югуриш тиззалар учун бироз қийинчилик келтириб чиқариши кўпчиликка маълум. Аммо 2013 йилги тадқиқотлар шуни кўрсатдики, мўътадил югуриш тиззадан ташқари, бўғим касалликлари хавфини сезиларли даражада камайтиради. Энг муҳими, тўғри кроссовка танлаш, асфальтда югурмасликка ҳаракат қилиш лозим.

Балиқ истеъмолини кўпайтириш

Омега-3 ёғ кислоталарига бой овқатлар нафақат артритнинг олдини олишга ёрдам беради: 2017 йилги тадқиқотлар шуни кўрсатдики, ҳафтасига икки марта балиқ истеъмол қилган беморларда суяк оғриқлари камроқ бўлган. Олимлар буларнинг барчаси ёғ кислоталарининг яллиғланишга қарши хусусиятлари билан боғлиқ деб ҳисоблайди ва улар билан парҳезга иложи борича кўпроқ табиий озиқ-овқат маҳсулотларини киритишни маслаҳат беради.

Зиналардан кўтарилиш

Агар бўғимларда оғриқ кузатилса ҳам, лифт ёки эскалаторда юришни камайтириш лозим. Бу кейинчалик яхши натижа берадиган машғулотдир. Ва зиналардан кўтарилиш эса ҳаёт тарзига жисмоний машқлар қўшишнинг энг осон йўлидир.