Байден Ким Чен Ин билан учрашув шартларини маълум қилди

АҚШ президенти Жо Байден КХДР етакчиси Ким Чен Ин билан муайян шартлар асосида учрашиб суҳбатлашиб олишга тайёрлигини билдирди. У бу ҳақда Жанубий Корея давлат раҳбари Мун Чжэ Ин билан Оқ уйда ўтказилган матбуот анжуманида маълум қилган.

«Агар у (Ким Чен Ин — таҳ.) учрашувимиз учун муайян мажбуриятларни ўз зиммасига олса (КХДРдаги ядро қуроли йўқ қилинса), кўришиб, гаплашиб олиш учун шарт-шароитлар таъминланса, биз суҳбатлашиб олишимиз мумкин», — деган Байден.

АҚШ президентининг сўзларига кўра учрашувлар ҳақида гапиришдан аввал муайян шартларнинг бажарилишини таъминлаш зарур. Унинг қўшимча қилишича, бу борадаги музокаралар қуйи даражада бошланади.

Шунингдек, Байден яқин тарихда қилинган ишларни такрорламоқчи эмаслигини маълум қилган.

«Мен унга (Ким Чен Ин — таҳ.) ўзи истган нарсани, яъни халқаро даражада тан олиниш имконини бермоқчи эмасман», — деган АҚШ президенти.

Washington Post нашрининг ёзишича,т Байден юқоридаги жумлалар орқали ўзидан олдин мамлакат раҳбари бўлган Дональд Трампнинг КХДР раиси билан халқаро даражадаги муносабатларига шаъма қилган.

АҚШ давлат раҳбари мамлакатнинг КХДР масалалари бўйича янги махсус вакили этиб, давлат котибининг Шарқий Осиё ва Тинч океани минтақаси масалалари бўйича ёрдамчиси вазифасини бажарувчи лавозимида ишлаган Сун Кимни тайинлаган. Тайинлов ҳақида эълон қилган вақтида Байден АҚШнинг Жанубий Корея билан Корея ярим оролидаги кескинликни камайтириш учун прагматик қадамлар ташлашга тайёрлигини таъкидлаб ўтган. У асосий мақсад ҳудудни ядро қуролидан тўлиқ тозалаш эканини билдирган.

Март ойида Оқ уй матбуот котиби Жен Псаки Байденнинг Трамп каби Ким Чен Ин билан шахсан кўришмоқчи эмаслигини айтган.

«Менимча Байденнинг бу борадаги ҳаракатлари ва мақсади бутунлай бошқа», – деган Псаки.

Ундан аввал Reuters агентлиги АҚШ администрациясининг қарийб бир ой давомида КХДР раҳбарияти билан алоқа ўрната олмаганини хабар қилган. Агентлик АҚШ ҳукуматининг Шимолий Корея билан ядро дастури борасида фикр алмашиш учун алоқага чиқишга урингани ҳақида ёзган.

2020 йил октябрь ойи охирида АҚШ президенти лавозимида ишлаган Дональд Трамп ўз ҳаракатлари билан мамлакат ҳамда КХДР ўртасида юзага келиши мумкин бўлган ядро урушининг олди олингани ҳақида гапирган.

«Ҳозирги пайтда менинг Ким Чен Ин билан муносабатларим жуда яхши. Содир бўлиши мумкин бўлган урушнинг эса олди олинган», – дея мақтанган Трамп.

Трамп ҳамда Ким Чен Ин уч марта учрашган. Биринчи учрашув 2018 йил 12 июнда Сингапурда ўтказилган ва икки давлат раҳбарлари Корея яриморолида ядро қуролидан фойдаланмаслик ҳақидаги декларацияни имзолаган. Кейингги музокаралар 2019 йил Вьетнамда бўлди ва ҳеч қандай ҳужжат имзоланмасидан олдин якунига етди. Шунингдек, Трамп ва Ким Чен Ин бир неча марта хатлар орқали ҳам маълумот алмашган. Кейинчалик Шимолий Корея ракеталар синовини бошлади ва бу АҚШ ҳукуматининг норозилигига сабаб бўлди.