Сеулда кўкат ва сабзавотлар етиштириладиган «ақлли» томорқа бўлган ноодатий метро станцияси мавжуд, деб хабар бермоқда Hi.Tech.Mail.ru.
Metro Farm деб номланган ферма Сангд станциясида жойлашган. Бу ерда фақат сабзавот ва кўкатлар етиштирилади.
Бу ернинг ноодатийлиги шундаки, «ақлли» томорқадаги ўсимликларни одамлар эмас, балки роботлар ва ақлли тизимлар кузатади. Улар сув, ёруғлик, ҳарорат, намлик ва карбонат ангидрид даражасини назорат қилади. Шунингдек, улар кўрсаткичларнинг ўзгаришини таҳлил қилади ва натижаларни тезда етказади. Барча ўсимликлар вертикал биноларда ўстирилади.
«Мазкур томорқада энг сўнгги усул ва технологиялардан фойдаланган ҳолда ўсимликларни одатдаги фермер хўжалигига қараганда икки баравар тез етиштириш мумкин», — дейди лойиҳага эгалик қилувчи Farm8 компанияси вакили.
Farm8 компанияси шу каби фермер хўжаликларини бошқа жойларда, ҳатто Антарктидада ҳам қуришни режалаштирмоқда. У ердаги «ақлли» ферма жанубий кореялик мутахассислар назорати остида бўлади. Режага кўра, кунига 2 килограмм сабзавот, шу жумладан, чили қалампири, қовоқ ва бодрингдан ҳосил олиш кутилмоқда.
«Агар Антарктидада бодринг етиштира олсангиз, уни исталган жойда ўстиришингиз мумкин», — дейди стартап асосчилари.
Изоҳ (0)