Тошкент шаҳрида 23 апрель куни 92 ёшли аёл қизи ва набираси томонидан калтакланди. Бу ҳақда «Vzglyad.uz»га аёлнинг невараси Даврон Тиллаев маълум қилган, деб хабар беради «Sof.uz».
Маълум бўлишича, 23 апрель куни уй-жой масаласи бўйича она ва қиз ўртасида жанжал юзага келган. Аёл каравотда ётган пайтида қизи унинг сочидан тортиб, ерга судраб туширган ва ура бошлаган. Аёл 3 соатга яқин ерда ётган. Тиллаевнинг айтишича, қизи унинг қўл ва оёғига пичоқ билан урган. Шунингдек, унинг ички кийимини оғзига тиқиб, протезини тортиб олган ва устига пешоб қуйган.
Аёлнинг набираси 25 апрель куни меҳмонга келган ва бувисининг оғир аҳволдалигини сезган. Аёлнинг қизи ва невараси тўшакдан йиқилиб тушганини айтган. Бироқ Тиллаев бунга ишонмаган, чунки унинг оёқлари ишламай, танаси ва юзи кўкарган бўлган.
Шундан сўнг невара кампирни олиб бориб, даволаниш учун хусусий клиникага жойлаштирган. Даврон Тиллаев ариза ёзганидан кейин ҳам ҳеч қандай чора кўрилмаганини айтмоқда.
«26 апрель, душанба куни мен ариза ёздим. Бугун сешанба куни саккизинчи кун ўтди, жавоб йўқ», — дейди у. Маълум бўлишича, ижтимоий тармоқларда тарқалган видеодан кейин уларга суд экспертизаси келган.
«Экспертиза кеча бўлиб ўтди, энди жавоб чиқиши учун 3–4 кун керак бўлади. Бугун ҳамма суриштиришни бошлади. ИИББдан қўнғироқ қилишди, милиция бўлимига чақиришди», — дейди невара.
Шу билан бирга, ҳозирда кекса аёлнинг аҳволи яхшилангани қайд этилган. Бундан ташқари, Тиллаев бувисининг квартираси бошқа бир невараси номига ноқонуний равишда рўйхатдан ўтганини айтмоқда. Шаҳар Ички ишлар бош бошқармасининг нашрга маълум қилишича, жиноятчиликнинг олдини олиш бошқармаси бошлиғининг ўринбосари майор Мақсуда Хўжаназарова ишни назоратга олган.
Аввалроқ Сурхондарёда қайнака уй талашиб келинни ургани, Наманганда она-бола 30 га яқин эркак томонидан аёвсиз калтаклагани, Чироқчида номаълум шахс ҳокимлик биноси олдида бир қизни ургани тўғрисида хабар берилганди.