Тошкент вилоятининг маъмурий маркази — Нурафшонда Nurafshon business city лойиҳаси амалга оширилади. Бу Вазирлар Маҳкамасининг 28 апрелдаги қарорида кўзда тутилган, деб хабар бермоқда «Gazeta.uz».
Нурафшон шаҳри (собиқ Тўйтепа) 2017 йилда Тошкент вилоятининг маъмурий марказига айланди (бунга қадар унинг маъмурий маркази бўлмаган). Бу ерга пойтахтдан Тошкент вилояти ҳокимлиги кўчирилди. Ўша вақтда Нурафшонни Ўзбекистондаги биринчи «ақлли» шаҳарга айлантириш режаси маълум қилинганди.
Ҳукуматнинг 2018 йил 26 мартдаги қарорига мувофиқ, Тошкент вилояти маъмурий маркази қурилиши учун 246,2 гектар ер, шу жумладан, «Кончи» массиви ҳудудида 113 гектар ва «Янги турмуш» массиви ҳудудида 133,2 гектар ер ажратилганди.
Маъмурий марказ ҳудудида объектлар қурилишини мувофиқлаштириш ва назорат қилиш мақсадида Нурафшон шаҳри ҳокимлиги ҳузурида «Тошкент вилояти маъмурий марказини қуриш дирекцияси» ДУК ташкил этилган эди.
Янги қарор билан «‘Ақлли шаҳар’ концепцияси бўйича Нурафшон шаҳрида Тошкент вилояти маъмурий марказини қуриш» инвестициявий лойиҳаси Nurafshon business city концепциясига ўзгартирилмоқда. Аввал ташкил этилган дирекция «Тошкент вилоятида бизнес марказларини қуриш дирекцияси» ДУК шаклида қайта ташкил этилади. Барча ҳуқуқ ва мажбуриятлар ҳамда тузилган шартномалар янги дирекцияга ўтказилади.
Дирекцияга ва бизнес марказларини қуриш бўйича лойиҳала иштирокчилари — инвесторлар, бош пудрат ташкилотлари ҳамда норезидентларга Президентнинг 2018 йил 2 августдаги қарорида белгиланган солиқ ва божхона имтиёзлари татбиқ этилади.
2018 йилнинг ноябрида Spot Сингапурнинг Universal Success Enterpriseс компанияси Нурафшондаги «Ақлли шаҳар» лойиҳасига 2,5 миллион доллар инвестиция кўзда тутилган меморандум имзоланганини маълум қилганди.
2020 йилнинг октябрида Тошкент вилояти ҳокимлиги ва Сингапурнинг Universal Success Enterprises компанияси Nurafshon city’ни қуриш бўйича ҳамкорлик тўғрисида бош келишувни онлайн тарзда имзолагани маълум қилинганди. Лойиҳа уч босқичда амалга оширилиши кутилмоқда, инвестицияларнинг умумий ҳажми эса лойиҳанинг техник-иқтисодий асосларини тайёрлаш натижаларига кўра аниқланади.
2020 йилнинг февралига келиб эса пойтахтдан Нурафшонга қадар метро линиясини қуриш режалаштирилаётгани хабар қилинганди.
Давлат харидлари ягона портали маълумотларига кўра, «Тошкент вилояти маъмурий марказини қуриш дирекцияси» фақат иккита йирик шартномани имзолаган — Smart City ҳудудида 9,7 миллиард сўмга Тошкент вилоятининг ИИББ маъмурий биносини қуриш ва Нурафшонда 64 миллиард сўмга маъмурий суд биносини қуриш.
Изоҳ (0)