Олмалиқ кон-металлургия комбинати (ОКМК)га ишга жойлашиш масаласи сабаб бир гуруҳ аёллар шаҳардаги йўлнинг қатнов қисми тўсиб қўйганди. Ҳолатни ўрганиб чиққан Бандлик ва меҳнат муносабатлари вазирлиги расмий баёнот берди.
Маълум қилинишича, Ўзбекистон қонунчилигида ижтимоий эҳтиёжманд аҳоли тоифалари учун корхона ва ташкилотларда иш ўринлари захираланиши белгиланган. Олмалиқ шаҳар ҳокимининг 2020 йил 10 сентябрдаги қарори билан 73 та корхона ва ташкилотда 2021 йил учун 670 та иш жойлари (квота) захираланган. Хусусан, қарорда ОКМКда ижтимоий эҳтиёжманд қатлам учун 451 та иш ўрни захираланган.
Ҳокимнинг ушбу қарорини ижро этиш мақсадида ОКМК томонидан 2020 йил 30 декабрда чиқарилган буйруққа кўра, 2021 йил учун жамиятда:
- 140 та иш ўрни ўн тўрт ёшгача ва ногирон болалари бўлган ёлғиз ота, ёлғиз оналар ва кўп болали оилалар учун;
- 283 та иш ўрни умумий ўрта ва ўрта махсус, касб-ҳунар таълими муассасаларини тамомлаган ёшлар, шунингдек, олий таълим муассасаларининг давлат грантлари бўйича таълим олган битирувчилари учун;
- 15 та иш ўрни сафарбарлик чақируви захирасида хизматни ўтаган ва Ўзбекистон Республикаси Қуролли кучлари сафларидан муддатли ҳарбий хизматдан бўшатилган шахслар учун;
- 7 та иш ўрни ногиронлиги бўлган шахслар ва пенсияолди ёшидаги шахслар учун;
- 4 та иш ўрни жазони ижро этиш муассасаларидан озод қилинган ёки суднинг қарорига кўра тиббий тусдаги мажбурлов чоралари қўлланилишидан озод қилинган шахслар учун;
- 1 та иш ўрни одам савдоси қурбонлари учун захираланган.
Koмбинатнинг 2021 йил 6 мартдаги ҳисоботида январь март ойлари давомида захираланган иш ўринларига 105 нафар ижтимоий ҳимояга муҳтож ва иш топишда қийналаётган фуқаролар ишга қабул қилингани қайд этилган. Бундан ташқари, 2021 йил бошидан буён комбинатга 362 нафар фуқаро ишга қабул қилинган. Улардан 219 нафари ёшларни (42 нафари «ёшлар дафтари»га киритилган) ташкил этади.
Шунингдек, ОКМКга ишга жойлаштиришда бериладиган квота йўлланмаларининг мавжуд мутахассисликлар ва бўш иш ўринлари бўйича берилишида шаффофликни таъминлаш, жамоатчилик назоратини ўрнатиш мақсадида шаҳар ҳокимлиги, комбинат мутахассислари, депутатлар, Ёшлар ишлари агентлиги, ногиронлар жамияти вакилларидан 11 кишидан иборат комиссия таркиби шакллантирилган.
«Ушбу комиссия фуқароларни захираланган иш ўринларига ишга жойлаштириш жараёнида корхонадаги ишларнинг профессионал тузилмаси ва унинг фаолиятининг ўзига хос хусусиятлари ҳисобга олинишини назорат қилади», — деб қайд этмоқда вазирлик.
Юқоридагилардан келиб чиқиб, қуйидагиларни амалга оширишга келишилган:
Биринчидан, вазирлик ва ОКМК мутахассислари билан ҳамкорликда йўлланма берилган фуқароларни Вазирлар Маҳкамасининг 2017 йил 5 декабрдаги қарори билан тасдиқланган Низомнинг 3-бандида келтирилган муҳтожлар тоифасига тўғри келишини қайта кўриб чиқилади, йўлланмалари қонуний ўз асосини топган фуқаролар ОКМКга 2021 йилнинг сентябрь ойига қадар босқичма-босқич ишга қабул қилиш режаси тасдиқланади ва ишга жойлаштирилади.
Иккинчидан, ижтимоий эҳтиёжманд тоифасига кирмайдиган ҳамда комбинат эҳтиёжидаги мутахассислигига тўғри келмайдиган фуқароларни, шаҳардаги 81 та (ОКМК дан ташқари) корхона ва ташкилотлардаги 871 та бўш (вакант) иш ўринларига ишга жойлаштириш чоралари кўрилади (жумладан, Винтаж деним МЧЖдаги 50 та иш ўрни, «Олмалиқ тола текстиль» МЧЖ да 43 та иш ўрни, «Болезо текстиль» МЧЖдаги 25 та иш ўрни, «Сиркечи Taшкент текстиль» МЧЖдаги 39 та иш ўрни мавжуд).
Учинчидан, комбинатга тегишли бўлган 250 гектар ер майдони қишлоқ хўжалиги экинларини экиш учун бир фуқарога ўртача 50 сотихдан ажратиб берилади, етиштирилган маҳсулотлар комбинат томонидан бозор нархларида сотиб олинади, шунингдек, ўзини-ўзи банд қилиш, тадбиркорликка жалб қилиш, бандликни рағбатлантирувчи субсидиялар ажратиш орқали бандлигига кўмаклашилади.
Аввалроқ Қашқадарёнинг Чироқчи туманида 1-синфда ўқувчи қиз ЙТҲ оқибатида вафот этгач, бир гуруҳ аёллар 23 апрель куни Қарши—Самарқанд йўлининг Хўжаобод қишлоғи ҳудудидан ўтувчи қисмини норозилик тариқасида тўсиб қўйганди. Вазият Сенат назоратига олинган.
Изоҳ (0)