Ўзбекистонлик ўқувчилар Халқаро кимё олимпиадасида олтин, кумуш ва бронза медалларни қўлга киритди

Дунёнинг 28 та давлати ўқувчилари ўртасида 20—26 апрель кунлари онлайн тарзда ўтказилган 55-Халқаро Менделеев кимё олимпиадасида Ўзбекистондан қатнашган 7 нафар ўқувчининг барчаси ғолибликни қўлга киритди. Бу ҳақда Халқ таълими вазирлиги матбуот хизмати хабар берди.

Олимпиадада Австрия, Хитой, Туркия, Россия, Саудия Арабистони, Исроил, Хорватия, Венгрия ва бошқа мамлакат жамоалари билан бирга Ўзбекистон терма жамоаси ҳам иштирок этган. Халқаро олимпиада Халқ таълими вазирлигининг Фан олимпиадалари бўйича иқтидорли ўқувчилар билан ишлаш департаменти томонидан Тошкент шаҳри, Юнусобод туманидаги 9-Ахборот технологияларга ихтисослаштирилган мактабда ўтказилди ва жараёнлар ташкилий қўмита томонидан жами 17 та вебкамера ва микрофон орқали кузатиб борилган.

Халқаро олимпиада иккита назарий турда ўтказилган бўлиб, илк босқичда барча иштирокчилар 8 та мажбурий масала ишлаган бўлса (жами 80 балл), иккинчи босқичда кимё фанининг 5 бўлимига оид 15 масаладан ихтиёрий 5 тасини ишлаш талаб қилинган (жами 75 балл). Икки босқич натижаларига кўра ғолиб ўқувчилар аниқланган.

Якуний натижаларга кўра, Ўзбекистон шарафини ҳимоя қилган ўқувчилар 1 та олтин, 4 та кумуш ва 2 та бронза медаллари билан тақдирланган. 2020 йилги 54-Халқаро Менделеев кимё олимпиадасида Ўзбекистон терма жамоаси 1 та олтин ва 5 та бронза медалини қўлга киритган эди. Бугунги кунгача Ўзбекистон терма жамоасининг ҳисобида 7 та олтин, 20 та кумуш ва 51 та бронза медали мавжуд.

Ғолиб иштирокчиларга дипломлар ва медаллар ҳамда совға қилинадиган китоблар ташкилий қўмита томонидан почта орқали жўнатилади.

55-Халқаро Менделеев кимё олимпиадасида совриндор ўринларни қўлга киритган ўқувчилар:

Олтин медал:

Фирдавс Собиров — Бухоро шаҳар 35-умумий ўрта таълим мактаби ўқувчиси.

Кумуш медал:

• Азимжон Жамолов — Абу Али ибн Сино номидаги ёш биологлар ва кимёгарлар ихтисослаштирилган мактаб-интернати ўқувчиси;
• Собиржон Омонов — Тошкент педиатрия тиббиёт институти академик лицейи ўқувчиси;
• Нафиса Нормуродова — Тошкент педиатрия тиббиёт институти академик лицейи ўқувчиси;
• Дурдона Мухторхўжаева — Абу Али ибн Сино номидаги ёш биологлар ва кимёгарлар ихтисослаштирилган мактаб-интернати ўқувчиси.

Бронза медал:

• Икромиддин Боймаҳаммадов — Абу Али ибн Сино номидаги ёш биологлар ва кимёгарлар ихтисослаштирилган мактаб ўқувчиси;
• Бегзод Рўзибоев — Тошкент педиатрия тиббиёт институти академик лицейи ўқувчиси.

Маълумот учун, Халқаро Менделеев кимё олимпиадаси МДҲ, Болтиқбўйи ва Жанубий-Шарқий Европа давлатларининг иқтидорли ўқувчилари иштирок этиб келаётган халқаро олимпиадалардан бири ҳисобланади. Ушбу олимпиадада турли давлатларнинг юқори синф ўқувчиларидан иборат терма жамоалар иштирок этади.

Мазкур олимпиада 1966 йилдан бошлаб ҳар йили турли давлатларда ўтказиб келинмоқда. Бугунги кунда дунёнинг 30 мамлакатидан 200 нафар энг иқтидорли ўқувчи кимё фанидан мураккаб ва ностандарт масалаларни ечишда беллашади.