Леонардо Ди Каприо Netflix’нинг «Тепага қарама» (Don’t Look Up) комедиясида бош ролни ижро этишга рози бўлишдан олдин фильм сценарийсини беш ой давомида ўрганиб чиққан ва унга қўшимчалар киритган. Бу ҳақда комедия режиссёри ва сценарий муаллифи Адам Маккейга таяниб Esquire маълум қилди.
Маккейнинг сўзларига кўра, Ди Каприо унинг фильмида суратга тушишни хоҳлашига ишонмаган. Бироқ актёрга сценарий жуда ёққан ва тўрт—беш ой давомида уни ўрганиб чиқиб, янги ғояларни таклиф этган. «Карантин сабаб узилиб қолдик, бироқ фильмни суратга олишнинг хавфсиз йўлини топганимиздан сўнг у актёрлар таркибидан ўрин олди. Мен бунга ишона олмайман», — дейди Маккей.
Картинада суратга тушишга биринчи бўлиб Женнифер Лоуренс рози бўлган. Маккейнинг айтишича, у «Ўгай ака-укалар» комедиясининг мухлиси бўлган. Шунингдек, картинада Мерил Стрип, Кейт Бланшетт, Жона Ҳилл, Тимоти Шаламе, Мэттью Перри, Ҳимеш Пател, шунингдек, қўшиқчи Ариана Гранде ва рэпер Кид Кади ҳам суратга тушган.
«Тепага қарама» комедиясида Ди Каприо ва Лоуренс иккита астроном — доктор Рэндалл Минди ва Кейт Дибиаски ролини ижро этган. Қаҳрамонлар инсониятни Ерни ярим йилдан сўнг бутунлай йўқ қилиб юборишга қодир метеорит учиб келаётганидан огоҳлантириш мақсадида турга отланади.
Январь ойида Netflix картинанинг анонси билан бўлишганди. Премьеранинг расмий санаси ҳозирча эълон қилинмади, бироқ Маккей картина 2021 йилнинг ноябрь—декабрь ойларида намойиш этилишини таъкидламоқда.
Изоҳ (0)