Мактабгача таълим вазирлиги ва «Замин» фонди ҳамкорликда инклюзив таълимни ривожлантиради
Мактабгача таълим вазирлиги ҳамда «Замин» халқаро жамоат фонди инклюзив таълим учун шарт-шароитлар яратиш тўғрисида меморандум имзолади. Бу ҳақда вазирлик матбуот хизмати хабар берди.
Меморандум ногиронлиги бор болаларни қўллаб-қувватлаш, уларни тиклаш, реабилитация қилиш ва жамиятда ўз ўрнини топиш учун мослаштиришга қаратилган чора-тадбирларни ҳам ўз ичига олган.
«Энг кўп кўмак ва эътиборга муҳтож фарзандларимизга яна бир ижобий қадамларимиз билан биргаликда уларнинг ҳаётини ёрқин, қизиқарли, таассуротларга бой қиламиз деган умиддаман. Муҳими, бундай болажонларимиз сифатли мактабгача таълим олиш ҳуқуқини рўёбга чиқариш имконига эга бўлади», — деган Агриппина Шин.
Хабарда айтилишича, икки томон вакиллари конференциялар, семинарлар, тренинглар, кўргазмалар, симпозиумлар ва бошқа тадбирлар орқали ўзаро манфаатли масалалар, турли лойиҳа ва дастурларни биргаликда амалга ошириш, мактабгача таълим тизими ходимларининг салоҳиятини оширишга келишиб олди.
Эслатиб ўтамиз, «Мактабгача таълим ва тарбия тўғрисида»ги қонунда инклюзив гуруҳларга эга мактабгача таълим ташкилоти тушунчаси киритилган. 2020 йил 23 сентябрь куни қабул қилинган янги таҳрирдаги «Таълим тўғрисида»ги қонунга ҳам илк бора «инклюзив таълим» тушунчаси киритилди.
