Юлдуз Усмонова концертида кекса актёр ва актрисаларни йиғлатди (фото ва видео)

Ўзбекистон халқ артисти Юлдуз Усмонова «Халқлар дўстлиги» саройида 10—25 март кунлари «Юрак» деб номланган навбатдаги яккахон концерт дастурини тақдим этмоқда.

Ўн олти кун давомида ўн саккизта сеансдан иборат бўлиши режалаштирилган дастур тўлиқ жонли ижрода бўлиб ўтмоқда. «Дарё» мухбири Феруз Муҳаммад дастурнинг энг қизиқ жараёнларидан иборат репортаж тайёрлади.

Дастурнинг 15 март куни бўлиб ўтган олтинчи кунида аввалдан режалаштирилмаган, ҳаттоки Юлдуз Усмонованинг ҳам хабари бўлмаган ҳолат бўлиб ўтди.

«Ғанимат» деб номланган қўшиқ якунида кутилмаганда мухлислар орасидан «Халқлар дўстлиги» саройи бош режиссёри Зокир Қаюмов сўзга чиқиб, қуйидаги сўзларни гапирди.

Юлдузхон, узр сўраймиз, бугун томошабинларимизга бир совғамиз бор. Устозларни ҳурмат қилишингизни жуда яхши биламиз, устозларнинг дуоси билан шу саҳналарда ижод қилиб юрибсиз. Сизнинг кўнглингиз Каъбасидан жой олган, театр ва кино санъатининг устунларини концертингизга таклиф қилиб, кўриб қолсангиз, ҳаяжонланманг деб, уларга чироқ «бермасдан» ўтирибмиз.

Бугунги концертингизда афсонавий актёрлар Ўзбекистон халқ артисти Турғун Азизов, Рихси Иброҳимова, Тўти Юсупова, Лутфулла Саъдуллаев, Бахтиёр Ихтиёров, Теша Мўминов, Муҳаммадали Абдуқундузов, сизларнинг дуойингиз билан Туркиядан омон-эсон келган Саида Раметова, барча актёрларимизнинг келишини таъминлашга ёрдамлашган Ўзбекистонда хизмат кўрсатган артист Ботир Муҳаммаджоновлар меҳмон бўлиб ўтиришмоқда.

Зокир Қаюмов, «Халқлар дўстлиги» санъат саройи бош режиссёри

Юлдуз Усмонова саҳнадан тушиб, устоз санъаткорлар олдига бориб, уларга миннатдорлик билдирди.

«Барчангизга каттакон раҳмат. Борингларга шукр. Умринглар узун бўлсин, илоҳим. Биз ҳаммамиз сизларнинг яратган ролларингиз билан катта бўлдик. Таъзимларимизни қабул қилинглар», — дея бутун залдан олқишларини аямасликларини сўради.

Юлдуз Усмонова томонидан куйланган «Ғанимат» деб номланган тарона нафақат мухлисларни, балки Ўзбекистон халқ артистларини ҳам кўз ёшларини тўхтата олмади. Саҳнадаги катта мониторда пандемия вақтида ва ундан аввалроқ вафот этган маданият, санъат ва сиёсат олами вакилларининг суратлари намойиш қилинди.

Маълум бўлишича, Ўзбекистон халқ артистларининг концерт дастурида меҳмон бўлиши ғояси концерт бош режиссёри ва продюсери Мансур Агалиевга тегишли бўлиб, дастурда барча халқ артистлари келиши режалаштирилган экан.