SpaceX компаниясининг илк космик сайёҳига айланиши кутилаётган япониялик миллиардер Юсаку Маэдзава Ойга биргаликда парвоз қилиш учун саккиз кишилик жамоага номзодларни қабул қилиши тўғрисида эълон қилди. Бу ҳақда у ўзининг Twitter’даги видеомурожаатида айтиб ўтди, деб ёзади «РБК».
«Мен ушбу миссияда иштирок этиш учун жамоа йиғмоқчиман. Саёҳатга 10—12 киши йўл олади, шундан саккиз нафарини шахсан ўзим таклиф қиламан», — деди Маэдзава.
Маэдзаванинг сўзларига кўра, парвоз 2023 йилда амалга оширилади. Танловда иштирок этиш истагида бўлган номзод иккита шартга жавоб бериши керак: биринчиси, у ўз фаолияти тўғрисида гапириб бериши ва Ойга парвоз унга жамият учун янада кўпроқ ёрдам беришида қандай аҳамият касб этишини тушунтириши керак. Иккинчи шартга кўра, номзод жамоада ишлаш ва унинг аъзоларини қўллаб-қувватлашга тайёр бўлиши керак.
Маэдзава — 45 ёшли миллиардер. У Япониядаги энг йирик Zozotown кийим-кечак дўконига асос солган. 2019 йил сентябрь ойида тадбиркор ўз акцияларининг катта қисмини Yahoo Japan компаниясига сотишга қарор қилган, ўшанда битим қиймати 3,7 миллиард долларни ташкил этган эди. Маэдзава Forbes’нинг 2020 йилдаги энг бой японияликлар рўйхатида 23-ўринни эгаллаган. Нашр маълумотларига кўра, унинг бойлиги 2 миллиард долларга баҳоланади. Forbes глобал рейтингида у 2020 йилдан бери 412 та поғонани йўқотиб, айни пайтда 1547-ўринни эгаллаб турибди.
SpaceX 2017 йилнинг бошида Ой бўйлаб тижорий парвоз амалга ошириш режасини маълум қилган эди. 2018 йилда компания раҳбари Илон Маск Маэдзаванинг Ойга бориши кутилаётган биринчи сайёҳ бўлишини эълон қилди. Ўшанда SpaceX бутун тарих давомида Ойга атиги 24 киши ташриф буюрганини ва Американинг 1972 йилги Аполлон миссиясидан кейин у ерга бошқа бирор ким бормаганини таъкидлаган.
2020 йилда японялик миллиардер коинотга биргаликда саёҳат қилиш учун ўзига қиз ҳамроҳ қидираётганини айтиб, танлов эълон қилган. Миллиардер ўз Twitter’да қидирув жараёни ҳақида ҳужжатли кўрсатув намойиш қилиши керак бўлган Япониянинг Abema TV стриминг хизматига ҳавола жойлаштирган. Унда танловда иштирок этиш учун ариза бериш ҳам мумкин эди. Маэдзаванинг таъкидлашича, ариза берувчи космик парвозларга қизиқадиган ва уларга тайёргарлик кўришда иштирок эта оладиган 20 ёш ва ундан катта бўлган ёлғиз аёл бўлиши керак эди. Талабга кўра, шунингдек, номзодлар «ҳар доим некбин» бўлиши ва дунё тинчлигини хоҳлаши керак. Икки ҳафта давомида танловда иштирок этиш учун 28 мингга яқин аёл ариза юборган, аммо кейинчалик Маэдзава таклифни бекор қилди ва «худбинларча қилинган қарори» учун узр сўради.
Аввалроқ SpaceX компанияси 2021 йилнинг охирига қадар тўртта сайёҳни орбитага юбормоқчилиги хабар қилинганди. Америкалик миллиардер Жаред Айзекман SpaceX’нинг орбитага хусусий парвози пулини тўлаган. Экипажнинг бир аъзоси лотерея орқали аниқланади.
Изоҳ (0)