Анча йиллардан буён соч тўкилиши муаммоси нафақат аёлларни, балки эркакларни ҳам қийнаб келмоқда. Ҳозирги кунда косметологиянинг энг фойдали процедураси деб айтилаётган соч мезотерапияси бунга ечим бўла оладими? Бу муолажани эркакларга қўллаш мумкинми? Хизматдан фойдаланиш нархлари қанча? Бу ҳақда «Дарё»га тажрибали шифокор-косметолог Ҳилола Файзиева батафсил маълумот бериб ўтди.

Фото: Instagram / @dr.hilola_xayrullayevna

Соч мезотерапияси — махсус игналар ёрдамида бошнинг соч қисмига инъекция қилиш методи. Инъекция таркибидаги препаратлар соч илдизини мустаҳкамлаб, қалинлаштиради, озиқа беради. Қолаверса, микроциркуляцияни яхшилаб, эрта оқаришининг олдини олади.

Бундан ташқари мезотерапия массаж ва ниқоблардан кўра самарали бўлиб, соч ўсишига ёрдам беради.

Фото: Google Images

Процедура тўғридан-тўғри соч фолликуласига таъсир қилади. Шу сабабли нафақат соч тўкилиши ва қазғоқни, балки ҳаддан ташқари қуруқ, ёғли бош терисини даволашда катта самара беради.

Процедура ҳар 7—10 кунда бир марта қилинади. Муаммога қараб муолажа натижаси динамикада кузатилади. Даволаш курси 4—8 ҳафтани ташкил этади. Фақат муолажани шифокор назорати остида амалга ошириш лозим.

Фото: Google Images

Бошқа муолажаларда бўлгани каби соч мезотерапиясини ҳам қўллаш мумкин бўлмаган ҳолатлар мавжуд.

Хусусан, алопеция (соч тўкилиши) касаллигининг ўткир даврида муолажадан фойдаланиш мумкин эмас. Чунки бу акс таъсир кўрсатиб, соч янада тез тўкилишига олиб келади. Шунинг учун соч мезотерапиясини қилишдан олдин, албатта, трихолог (соч бўйича мутахассис) билан маслаҳатлашиб олган маъқул.

Айни пайтда соч мезотерапиясининг битта муолажаси ўртача 150—600 минг сўмгача баҳоланади.