Пилингнинг юз териси учун қандай фойдаси бор? Муолажани неча ёшдан бошлаб қўллаган маъқул? Ўзбекистонлик мутахассис жавоби

Бугунги кунга келиб пилинг муолажаси энг кўп фойдаланилаётган хизмат турларидан бирига айланган. Хўш, унинг юз териси учун қандай ижобий хусусиятлари бор? Неча ёшдан муолажани қўллаш мумкин? Ўзбекистонда пилинг хизматларининг нархи қанча? Бу ҳақда «Дарё»га тажрибали шифокор-косметолог Ҳилола Файзиева батафсил маълумот бериб ўтди.

Пилинг қандай процедура?

Пилинг терининг устки қатлами, яъни ҳужайралари нобуд бўлган ўлик юзасидан халос бўлишга ёрдам беради. Шу билан бирга, ҳуснбузар, майда ажинлар, доғлардан қолган чандиқларни, қолаверса, аёлларни энг кўп ташвишлантирадиган муаммо — қора нуқталарни йўқ қилади.

Тўғри, мазкур процедура теридаги барча ёшга боғлиқ ўзгаришларни бартараф эта олмайди, аммо қаришнинг дастлабки белгиларига қарши курашишда ёрдам беради. Шунингдек, терини силлиқлайди, намлайди ва яшартиради. Қисқа қилиб айтганда, пилинг муолажасининг юз учун ижобий хусусиятлари талайгина.

Пилинг кимларга мумкин эмас?

Пилинг муолажасини қўллаш мумкин бўлмаган ҳолатлар ҳам мавжуд. Масалан, дерматитларда (яллиғланиш касаллигининг ўткир босқичида), юқумли касалликларда, терида очиқ жароҳатлар бўлганда, ҳомиладорлик ва эмизиш даврида, аллергия ва тутқаноғи борларга, қолаверса, қўлланилаётган пилинг таркибидаги ингредиентларга юқори сезувчанлиги бўлганларга тавсия этилмайди.

Пилингларнинг қандай турлари мавжуд?

Процедура таъсир кучига қараб енгил, ўрта ва чуқур даражадаги пилингларга бўлинади.

Косметологияда пилингларнинг Гликолли (гликолевий), салицилли (салициловий), азелаинли (азелаиновий), ретинолли (ретиноевий), маржонли (коралловий), сутли (молочний) сариқ (жёлтий) турлари жуда машҳур.

Мисол учун, азелаинли, салицилли пилинглар тошмалар ва улардан қолган излари бор юзларга фойда беради. Гликолли ва сутли пилинглар — юз рангини очартиришда ва доғларни оқартиришда қўлланилади.

Маржонли, сариқ пилинглар эса чуқур даражадаги муолажа бўлгани учун кўпроқ ҳуснбузарлардан қолган чандиқ ва доғларда кетказишда яхши натижа беради.

Чуқур даражадаги пилингларни бирданига қўллаб бўлмайди

Фаолиятим давомида кўп бўлади: аксарият аёлларимиз фойдаси ҳақида ўқиб, сариқ ёки маржонли пилинг қилиб қўйинг деб келади. Бироқ мен ана шундай мижозларга мазкур пилинглар жуда чуқур даражадаги муолажа бўлгани боис бирданига юзга қўллаб бўлмаслигини тушунтираман. Дастлаб юз терисининг фототип, эластиклиги, қалин ёки юпқалиги, тешикчалар кенг ёки торлигини аниқлаш лозим.

Шунингдек, ҳар доим енгил типдаги пилингдан бошлаш керак. Сабаби тери пилингга нисбатан қандай реакция беришини билмаймиз. Шунинг учун аввало юзни ўрта ва чуқур даражадаги пилингга тайёрлаб, кейин процедурани қўллашимиз лозим.

Қайси мавсумда пилинг муолажасидан фойдаланиш мумкин?

Авваллари куз ойининг охирларидан то баҳор бошлангунга қадар пилинг мавсуми дейиларди.

Чунки қуёшли кунларда пилинг қилинса, юзга ҳар хил доғлар тушиши ва кейинчалик асорати қолиши мумкин эди.

Бироқ ҳозирга келиб пилинглар шу даражада ривожланиб кетдики, энди исталган мавсумда енгил ва ўртача таъсирга эга процедурадан фойдаланиш мумкин. Фақат ундан сўнг доим қуёш нурига қарши кремларни суртиш ва иложи борича қуёш нурларидан ҳимояланиш лозим.

Чуқур даражадаги маржонли, сариқ пилингларни эса фақат қиш ойларидан то мартгача (қуёш нури кучсиз пайтларда) қўллаш мумкин.

Нима учун қуёшга қарши кремларни ҳатто уйда ҳам суртиб юриш керак?

SPF — ультрабинафша нурланишини ютадиган махсус модда бўлиб, терини қуёш нурларидан ҳимоя қилади. Биз доимо таркибида SPF бор кремлардан фойдаланиб юришимиз керак. Чунки ультрабинафша нурлари таъсирида юз териси жуда тез қарийди. Бундан ташқари, тери қуруқлашиб, ажинлар, доғ тушиши тезлашади.

Аксарият аёлларимиз SPF кремини фақатгина қуёшли кунларда суртиб, қишда фойдаланиш шарт эмас деб ҳисоблайдилар. Аммо қорда ҳам терига ножўя таъсир этувчи нурлар бор.

Ҳаттоки уйда ҳам SPF кремларини суртиб юриш лозим. Чунки компьютер, телефон ва телевизордан тараладиган нурлар ҳам юз терисига зарарлидир.

Қизларни ёшликданоқ ўзини ўзи парвариш қилишга ўргатиш лозим

Авваллари пилинг муолажаси фақат 18 ёшдан кейин тавсия қилинарди. Бироқ юз терисида муаммо пайдо бўлса, муолажадан 14 ёшда ҳам фойдаланиш мумкин. Афсуски, бизнинг менталитетимизда аксарият аёллар, айниқса, ёш қизлар косметологга бормайди, дейишади.

Қизининг юзида турли муаммолар бўлса-да, кўпчилик оналар мутахассисга олиб келмайди. Қачонки ёши ўтиб, юздаги муаммолар катталашгандан кейингина косметологга мурожаат қилишади. Лекин бу жуда нотўғри қараш.

Қизларимизни болалигиданоқ ўзини ўзи парвариш қилишга, нафақат юзига, балки бутун танасига тўғри муносабатда бўлишга ўргатишимиз керак. Боиси юздаги муаммолар катталашганидан сўнг уни бартараф қилгандан кўра бошиданоқ олдини олган афзал.