23 февраль куни амалий ташриф билан Кобул шаҳрига келган Ўзбекистон ташқи ишлар вазири Абдулазиз Комилов Афғонистон президенти Ашраф Ғани томонидан қабул қилинди. Бу ҳақда вазирлик матбуот хизмати хабар берди.
Фото: Ташқи ишлар вазирлиги
Маълум қилинишича, учрашув давомида Ўзбекистон ташқи ишлар вазири Президент Шавкат Мирзиёевнинг Афғонистон президенти Ашраф Ғанига йўллаган мактубини топширган. Шунингдек, учрашувда Ўзбекистон—Афғонистон кўп қиррали муносабатларининг ҳозирги ҳолати ва истиқболлари муҳокама қилинган.
Икки томонлама ҳамкорликнинг жорий юқори даражаси мамнуният билан қайд этилган ва барча соҳаларда ўзаро манфаатли яқин алоқаларни янада чуқурлаштиришга ўзаро содиқ эканликлари таъкидланган.
«Президент Ашраф Ғани биродар Афғонистон халқи номидан Афғонистон заминида тинчлик ва барқарорликни таъминлаш, мамлакат иқтисодиётини тиклашда ҳар томонлама қўллаб-қувватлаётгани учун Ўзбекистон Президенти Шавкат Мирзиёевга самимий миннатдорлик изҳор этди», — дейилади хабарда.
Афғонлараро сиёсий музокараларнинг узоқ муддатли тинчлик ўрнатиш ва мамлакатда хавфсизликни таъминлашдаги муҳим ўрни қайд этилган. Музокараларда икки томон кун тартибидаги бошқа масалалар ҳам кўриб чиқилган.
Аввалроқ Абдулазиз Комилов Қозоғистон, Туркманистон ва Тожикистон президентлари билан учрашиб, уларга Шавкат Мирзиёевнинг мактубини топширгани тўғрисида хабар берилганди.
Мавзуга доир: Абдулазиз Комилов Исландия элчиси билан учрашди
