23-fevral kuni amaliy tashrif bilan Kobul shahriga kelgan O‘zbekiston tashqi ishlar vaziri Abdulaziz Komilov Afg‘oniston prezidenti Ashraf G‘ani tomonidan qabul qilindi. Bu haqda vazirlik matbuot xizmati xabar berdi.
Ma’lum qilinishicha, uchrashuv davomida O‘zbekiston tashqi ishlar vaziri Prezident Shavkat Mirziyoyevning Afg‘oniston prezidenti Ashraf G‘aniga yo‘llagan maktubini topshirgan. Shuningdek, uchrashuvda O‘zbekiston—Afg‘oniston ko‘p qirrali munosabatlarining hozirgi holati va istiqbollari muhokama qilingan.
Ikki tomonlama hamkorlikning joriy yuqori darajasi mamnuniyat bilan qayd etilgan va barcha sohalarda o‘zaro manfaatli yaqin aloqalarni yanada chuqurlashtirishga o‘zaro sodiq ekanliklari ta’kidlangan.
“Prezident Ashraf G‘ani birodar Afg‘oniston xalqi nomidan Afg‘oniston zaminida tinchlik va barqarorlikni ta’minlash, mamlakat iqtisodiyotini tiklashda har tomonlama qo‘llab-quvvatlayotgani uchun O‘zbekiston Prezidenti Shavkat Mirziyoyevga samimiy minnatdorlik izhor etdi”, — deyiladi xabarda.
Afg‘onlararo siyosiy muzokaralarning uzoq muddatli tinchlik o‘rnatish va mamlakatda xavfsizlikni ta’minlashdagi muhim o‘rni qayd etilgan. Muzokaralarda ikki tomon kun tartibidagi boshqa masalalar ham ko‘rib chiqilgan.
Avvalroq Abdulaziz Komilov Qozog‘iston, Turkmaniston va Tojikiston prezidentlari bilan uchrashib, ularga Shavkat Mirziyoyevning maktubini topshirgani to‘g‘risida xabar berilgandi.
Mavzuga doir: Abdulaziz Komilov Islandiya elchisi bilan uchrashdi
Izoh (0)