Бухоро вилоятининг Жондор туманида ҳужжатларни сохталаштириш орқали ер майдони ажратиш эвазига деҳқондан 100 доллар ҳамда 2 миллион сўм пулни пора тариқасида олаётган шахс қўлга олинди. Ҳолат ДХХ ҳамда Иқтисодий жиноятларга қарши курашиш департаментининг вилоят бошқармаси ходимлари ҳамкорлигидаги тадбирда фош этилган, дея хабар берди «Дарё» мухбири.
Маълум бўлишича, Жондор туманида яшовчи фуқаро Б.Р. вилоят Ер тузиш ва кўчмас мулк кадастр давлат корхонаси туман бўлими мутахассиси Ф.С.дан ўзида мавжуд бўлган 23 гектар ер майдонини деҳқон хўжалигининг номига ҳужжатлаштириб беришини сўраб, мурожаат қилган. Ф.С. эса унга ваколатли раҳбарлар орқали мурожаатини ҳал қилиш учун ҳужжатларни сохталаштириш йўли билан ер ажратиш эвазига уни 4 минг доллар пора беришга ундаган.
Фуқаро Б.Р. деҳқончилик фаолиятига тўсиқ бўлаётган ушбу ҳолатдан норози бўлиб, департаментнинг вилоят бошқрамаси Жондор тумани бўлимига ариза билан мурожаат қилишга мажбур бўлган.
Шу куни ариза юзасидан ҳуқуқ-тартибот идоралари томонидан тезкор тадбир ўтказилган ҳамда вилоят Ер тузиш ва кўчмас мулк кадастр давлат корхонаси Жондор туман бўлими мутахассиси Ф.С. фуқаро Б.Р.дан ўз иш жойида кимёвий ишлов берилган 100 доллар ва 2 миллион сўм пулларни олдиндан тўлов сифатида олаётган вақтда ушланган.
Мазкур ҳолат юзасидан Ф.С.га нисбатан Жиноят кодексининг 168-моддаси (фирибгарлик) ва 28-моддаси (жиноят иштирокчиларининг турлари) билан жиноят иши қўзғатилиб, терговга тегишлилиги масаласини ҳал қилиш учун ҳужжатлар туман прокуратурасига юборилган.
