Buxoro viloyatining Jondor tumanida hujjatlarni soxtalashtirish orqali yer maydoni ajratish evaziga dehqondan 100 dollar hamda 2 million so‘m pulni pora tariqasida olayotgan shaxs qo‘lga olindi. Holat DXX hamda Iqtisodiy jinoyatlarga qarshi kurashish departamentining viloyat boshqarmasi xodimlari hamkorligidagi tadbirda fosh etilgan, deya xabar berdi “Daryo” muxbiri.
Ma’lum bo‘lishicha, Jondor tumanida yashovchi fuqaro B.R. viloyat Yer tuzish va ko‘chmas mulk kadastr davlat korxonasi tuman bo‘limi mutaxassisi F.S.dan o‘zida mavjud bo‘lgan 23 gektar yer maydonini dehqon xo‘jaligining nomiga hujjatlashtirib berishini so‘rab, murojaat qilgan. F.S. esa unga vakolatli rahbarlar orqali murojaatini hal qilish uchun hujjatlarni soxtalashtirish yo‘li bilan yer ajratish evaziga uni 4 ming dollar pora berishga undagan.
Fuqaro B.R. dehqonchilik faoliyatiga to‘siq bo‘layotgan ushbu holatdan norozi bo‘lib, departamentning viloyat boshqramasi Jondor tumani bo‘limiga ariza bilan murojaat qilishga majbur bo‘lgan.
Shu kuni ariza yuzasidan huquq-tartibot idoralari tomonidan tezkor tadbir o‘tkazilgan hamda viloyat Yer tuzish va ko‘chmas mulk kadastr davlat korxonasi Jondor tuman bo‘limi mutaxassisi F.S. fuqaro B.R.dan o‘z ish joyida kimyoviy ishlov berilgan 100 dollar va 2 million so‘m pullarni oldindan to‘lov sifatida olayotgan vaqtda ushlangan.
Mazkur holat yuzasidan F.S.ga nisbatan Jinoyat kodeksining 168-moddasi (firibgarlik) va 28-moddasi (jinoyat ishtirokchilarining turlari) bilan jinoyat ishi qo‘zg‘atilib, tergovga tegishliligi masalasini hal qilish uchun hujjatlar tuman prokuraturasiga yuborilgan.
Izoh (0)