Ўзбекистон Ҳиндистоннинг коронавирус вакцинаси ишлаб чиқарувчи компаниялари билан музокаралар олиб бормоқда
Ўзбекистон коронавирусга қарши вакциналарни ишлаб чиқарувчи ҳиндистонликлар билан музокаралар олиб бормоқда. Бу ҳақда Ҳиндистоннинг Ўзбекистондаги элчиси Маниша Прабхата «Ўзбекистон 24» телеканалига берган интервьюсида маълум қилган.
Фото: Инновацион ривожлантириш вазирлиги матбуот хизмати
«Ҳиндистон вакциналарни ишлаб чиқариш бўйича етарлича қувватга эга. Айни пайтда мамлакатимизда учта вакцина ишлаб чиқарилмоқда. Улардан бири клиник синовларнинг учинчи босқичида, қолган иккитаси иккинчи босқичда. Тез орада ушбу вакциналарни ишлаб чиқариш бошланади, одамлар фойдаланиш имконига эга бўлади. Ўзбекистон вакиллари Ҳиндистон компаниялари билан музокаралар олиб бормоқда. Умид қиламизки, ушбу музакаралар муваффақиятли бўлади», — деган у.
«Ҳиндистон вакцинаси ҳақида гапирадиган бўлсак, унда асос сифатида кучсизлантирилган вирус зарраси олинган. Унинг яратилишида оқсил зарраси клонлаштирилади, сўнг рекомбинант оқсиллар ҳосил бўлади. Ушбу вакцинада вирус компонентида мавжуд бўлган таркибий қисмлар мавжуд эмас», — деган Инновацион ривожлантириш вазири Иброҳим Абдураҳмонов
Фармасевтика саноатини ривожлантириш агентлиги директори ўринбосари Алишер Темировнинг сўзларига кўра, бугунги кунда Ўзбекистон Ҳиндистон билан коронавирусга қарши вакцина ишлаб чиқаришни ташкил этиш ҳамда вакцина ишлаб чиқиш тадқиқотларини ҳамкорликда ўтказишга алоҳида эътибор қаратмоқда. «Бугунги кунда Zydus Cadila, Bharat Biotech ва бошқа компаниялар билан музокаралар олиб борилмоқда», — деган у.
Ҳиндистон тиббий тадқиқотлар кенгаши билан ҳамкорликда ишлаб чиқилган Bharat Biotech компанияси вакцинаси — Covaxin учинчи босқич синовида бўлиб, кутилганидан бир неча ой олдин фойдаланишга топширилиши мумкин. Сўнгги босқич синовлари ноябрь ойида бошланган ва дастлабки натижалар унинг хавфсиз ва самарали эканлигини кўрсатган.
Zydus Cadila ўзининг ZyCoV-D вакцинасининг 3-босқич синовларини 30 минг кишида ўтказиши кутилмоқда. Тадқиқот бошланиши декабрь ойига мўлжалланган. Айни пайтда компания минг нафар иштирокчида иккинчи босқич синовларини якунлади ва тегишли маълумотларни шу ойда назорат қилувчи идорага топширишни режалаштирмоқда.
Эслатиб ўтамиз, Ўзбекистон COVAX дастурига 2020 йилнинг август ойида қўшилган. Дастур шартларига кўра, даромад даражаси юқори бўлган давлатлар вакциналар хариди учун пул тўлайди ва шу тариқа бу соҳадаги молиялаштириладиган давлатларга субсидия беради. Ушбу дастур доирасида иштирок этаётган барча 190 мамлакат, шу қаторда Ўзбекистон ҳам, 2021 йилнинг биринчи ярмидаёқ вакцина захирасидан фойдаланиш имконига эга бўлади.
Санитария-эпидемиология хизмати бошлиғининг ўринбосари, тиббиёт фанлари доктори Нурмат Отабеков Ўзбекистонга вакцина келса, биринчи навбатда 65 ёшдан юқори бўлган шахслар, тиббиёт ходимлари, ўқитувчилар, боғчалар тарбиячилари эмланишини маълум қилган.
