Қатар терма жамоаси Европа минтақасидаги ЖЧ—2022 саралаш босқичида иштирок этади. Бу ҳақда Қатар футбол ассоциацияси маълум қилди.
Қатар мусобақада норасмий равишда қатнашади. Жамоа А гуруҳидан ўрин олади ва Португалия, Сербия, Ирландия, Люксембург, Озарбайжон каби жамоаларга қарши баҳс олиб боради.
Қайд этиш жоиз, Европа минтақасидаги қуръага кўра, ўнта гуруҳнинг ярми бешта иштирокчидан иборат бўлди, қолган ярмида эса олтитадан қатнашчи иштирок этадиган бўлди. Миллатлар Лигаси ярим финалига йўлланма олган жамоалар тўғридан-тўғри бешта жамоали гуруҳлардан ўрин олди. А гуруҳи эса Миллатлар Лигаси ярим финалчиси иштирок этмайдиган ягона бешта қатнашчили гуруҳ бўлиб қолди.
Шу тариқа Қатар А гуруҳида олтинчи қатнашчи сифатида иштирок этади. Ушбу ўйинлар март, сентябрь, октябрь ва ноябрь ойидаги ФИФА кунларида ўтказилади.
Қайд этиш керак, Қатар 2021 йилнинг июнь ойида Копа Америка мусобақасида иштирок этади. Июлда эса КОНКАКАФ Олтин Кубогида қатнашади.
Эслатиб ўтамиз, Қатар Осиё Кубоги—2023 ва ЖЧ—2022 саралаш босқичи доирасида 2020 йилнинг декабрида Бангладешга қарши ўйнади. Уларнинг Ҳиндистонга қарши баҳси эса январда бўлиб ўтади. Аслида мазкур ўйинлар март ойида бўлиб ўтиши керак эди.
Маълумот учун, Қатар ЖЧ—2022 мезбони ҳисобланади. Жамоа Осиё минтақасидаги ЖЧ—2022 сарлашининг учинчи босқичида иштирок этмайди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)