Ички ишлар вазири матбуот котиби Шохруҳ Ғиёсов асоссиз маълумот тарқатаётган айрим ижтимоий тармоқ фаолларини «арзон PR» ортидан қувмасликка чақирди.
Фото: «Дарё»
Охирги кунларда айрим ижтимоий тармоқларда, алоҳида давлат органларининг раҳбарларини лавозимида қолиш ёки кетиш масалаларида текширилмаган ва асоссиз маълумотларни тарқатиш ҳолатлари кузатилмоқда.
Албатта, ўзининг ҳурматини билган ҳар қандай ижод аҳли, оммага тарқатаётган маълумотини текширилганлиги ёки ҳеч бўлмаганда холислиги ҳақида қайғуради, лекин шу билан бирга сўз эркинлигини «талтайишга» ёки «масхарабозликка» айлантиришга уринаётган фуқароларни ҳам кузатишимиз мумкин.
Шу сабабли, айрим ижтимоий тармоқ фаолларидан оддий этика қоидаларига риоя этишларини ҳамда арзон пиар ортидан қувишни бас қилишларини сўраймиз.
Шоҳрух Ғиёсов, ИИВ ахборот хизмати раҳбари
Сўнгги кунларда интернетда ички ишлар вазири генерал-лейтенант Пўлат Бобожоновнинг лавозимдан олиниши тўғридаги гап-сўзлар тарқалди. Хусусан, Telegram’даги каналлардан бирида ёзилишича, 7 декабрь куни Ўзбекистон Президенти ИИВнинг «Маърифат зали»да Конституция куни муносабати билан нутқ сўзлайди ва унда ички ишлар вазири Пўлат Бобожонов лавозимидан олинади.
Шунингдек, «Effekt.uz» нашри ҳам ушбу тадбирда ички ишлар вазири ишдан олиниши ва бошқа қатор бошқарув элитасида кадрлар алмашинуви содир бўлиши ҳақида ёзган.
Эслатиб ўтамиз, 2017 йилнинг сентябрида Пўлат Бобожонов Ўзбекистон ички ишлар вазири этиб тайинланган эди. 1961 йилда туғилган Пўлат Бобожонов 2012 йилдан бери Хоразм вилоятига ҳокимлик қилиб келаётган эди. Бунгача Хоразм вилояти ҳокимининг биринчи ўринбосари, Бухоро вилояти прокурори лавозимларида ишлаган. 2006—2011 йилларда Жиззах вилояти прокурори бўлган. У 2017 йилда ИИВ раҳбари лавозимида Абдусалом Азизовни алмаштирган.
