Ўзбекистон мусулмонлари идораси раиси, муфтий Усмонхон Алимов хизмат сафари билан Қашқадарё вилоятида бўлди. Бу ҳақда ЎзА хабар берди.
Сафар давомида муфтийга Дин ишлари бўйича қўмита раиси Абдуғофур Аҳмедов, диний идора иш бошқарувчиси Рустам Жамилов, Қашқадарё вилояти бош имом-хатиби Раҳматуллоҳ домла Усмонов ҳамроҳлик қилган.
«Ташриф доирасида ўтказилган вилоят имом-хатиблари билан мулоқотда муфтий ҳазратлари «ҳозирги мураккаб давр ва синовли кунларда диний соҳа ходимлари олдида турган долзарб вазифалар»ни баён этган. «Жумладан, халқимизнинг диний-маърифий эҳтиёжларини таъминлаш ва оғир кунларда аҳолига кўмакчи бўлиш, иш фаолиятини замон талаблари даражасида олиб бориш зарурлиги қайд этилди», — дейилади хабарда.
Мулоқот давомида тизимда олиб борилаётган ишлар таҳлил қилиниб, мавжуд муаммо ва камчиликлар ечими бўйича таклифлар берилган. Иш фаолиятини янада такомиллаштириш ва жаҳолатга қарши маърифат билан курашиш масалаларига эътибор қаратилган.
«Учрашувда Ўзбекистонда олиб борилаётган кенг кўламли ислоҳотларнинг мазмун-моҳияти, бугунги тинч ва осойишта кунларнинг қадрига етиш ҳамда шукроналик ҳисси билан яшаш тўғрисида кенг жамоатчиликка тушунтириш ишларини олиб бориш самарадорлигини янада ошириш зарурлиги таъкидланди», — дея қўшимча қилинган агентлик хабарида.
Шунингдек, тадбирда «Вақф» хайрия жамоат фондининг янги раҳбари Яҳё Абдураҳмонов имом-хатибларга таништирилган.
Мавзуга доир:
- Чироқчида 300 йиллик тарихга эга масжид сохта ҳужжатлар билан ёпилди. Аҳоли буни масжид имомига никоҳ ўқитмай қўйганлик учун жазо деб ҳисобламоқда
- Ўзбекистон мусулмонлари идораси Муҳаммад (с.а.в) ҳақидаги карикатура атрофида юзага келган баҳсларга муносабат билдирди
- Ўзбекистон мусулмонлари идораси: Қуръони каримни таҳқирлашга ҳеч кимнинг ҳаққи йўқ!
Изоҳ (0)