Янгиерда официант йигитни аёвсиз калтаклаган уч киши узр сўради. Уларга нисбатан жиноят иши қўзғатилган

Сирдарё вилояти Янгиер шаҳрида 1997 йилда туғилган йигитни уч киши томонидан аёвсиз калтаклангани ҳақида хабар берилган эди.

Бош прокуратуранинг аниқлашича, воқеа 2020 йил 10 ноябрь куни соат 13:00 да Янгиер шаҳар «Шодлик» МФЙ ҳудудида жойлашган «Грилл бар» кафеси ташқарисида юз берган. Ушбу кафе официанти, 1997 йилда туғилган Ҳ.Ж. унга олдиндан таниш бўлган 1995 йилда туғилган Т.С., 1994 йилда туғилган М.Ш. ва 2001 йилда туғилган Р.Б. томонидан калтакланган.

Айбдорларга нисбатан Янгиер шаҳар ИИБ ҳузуридаги Тергов бўлинмаси томонидан Жиноят кодексининг 277-моддаси 3-қисми «г» банди (жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган безорилик) билан жиноят иши қўзғатилиб, тергов ҳаракатлари ўтказилди.

Жабрланувчининг таъкидлашича, улар аввалдан таниш бўлган. Йигитлар ўртасида келишмовчиликлар бўлиб турган ва аввалдан улар бир-бирларини ёқтирмай келган.

«Ҳозир аҳволим яхши. Йигитчиликда бўлиб туради», – дейди калтакланган йигит.

Жиноят содир этган 3 йигит ҳам қилмиши учун узр сўраган.

«Бозорчага чиққанимда акам бир бола билан тортишиб турганини кўриб қолдим. Қизиққонлигим туфайли акамга қўшилиб, у болага қўл кўтардим», – дейди айбланувчилардан бири.

Айбланувчилар тегишли тартибда ҳибсга олинган.

Аввалроқ Андижонда автомобилида ЙТҲ содир қилган ИИБ ходими калтаклангани ҳақида хабар берилганди.