Ижтимоий тармоқларда 10 ноябрь куни Сирдарё вилояти Янгиер шаҳрида бир йигит уч киши томонидан аёвсиз калтаклангани акс этган видео тарқалди. Мазкур ҳолат бўйича Бош прокуратурага таяниб, «Xabar.uz» маълумот берди.
Маълум қилинишича, воқеа 2020 йил 10 ноябрь куни соат 13:00 да Янгиер шаҳар «Шодлик» МФЙ ҳудудида жойлашган «ГРИЛЛ БАР» кафеси ташқарисида юз берган. Ушбу кафе официанти, 1997 йилда туғилган Ҳ.Ж. унга олдиндан таниш бўлган 1995 йилда туғилган Т.С., 1994 йилда туғилган М.Ш. ва 2001 йилда туғилган Р.Б. томонидан калтакланган.
Бош прокуратура томонидан берилган маълумотга кўра, бу воқеага улар орасида олдиндан бўлиб турган келишмовчиликлар сабаб бўлган. Уч йигит официантни қўллари билан уриб, оёқлари билан тепган, кишининг соғлиғига амалда шикаст етказиши мумкин бўлган ёғоч жисмдан фойдаланиб, безорилик ҳаракатларининг олдини олиш чорасини кўрган бошқа фуқароларга қаршилик кўрсатган. Ҳ.Ж. танасининг турли жойларига тан жароҳати етган, уч шерик эса воқеа жойидан кетиб қолган.
Натижада Ҳ.Ж. ўнг қўл кичик бармоғи ёпиқ синиши, иккита тишининг синиб тушиши, танасининг кўплаб жойларида қизарган, сидирилган жароҳатлари билан Сирдарё вилояти Шошилинч тез тиббий ёрдам марказига мурожаат қилган.
Ҳолат юзасидан Янгиер шаҳар ИИБ ҳузуридаги Тергов бўлинмаси томонидан Ўзбекистон Республикаси Жиноят кодексининг 277-моддаси 3-қисми «г» банди (жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган безорилик) билан жиноят иши қўзғатилиб, тергов ҳаракатлари олиб борилмоқда.