Машҳурлар нафақат услуб ва соч турмагини ўзгартириб туришни, балки ташқи кўринишида ҳам яққол эксперимент қилишни ёқтириши ҳеч кимга сир эмас. Аммо шоу-бизнес вакилларининг қиёфа борасидаги қарори ҳар доим ҳам яхшилик билан тугайвермайди. Улардан айримлари ўзгариш борасида меъёрни билиб, вақтида тўхтаса, баъзилари муккасидан кетиб, ўзига хослигини йўқотади, кейин қанчалик хоҳламасин, аввалгидек бўла олмайди.
Мэри-Кейт Олсен
Опа-сингил Олсенлар ташқи кўриниши ўзига хослиги: катта кўзлари ва ёноқлари билан ажралиб турган. Эшли ҳали ҳам шундай кўринишга эга, аммо Мери юзида пластик ўзгартириш қилдирганидан кейин ҳаддан ортиқ озғин ва истарасиз кўриниб қолган. Қолаверса, унинг ташқи кўринишига назар ташлаб 34 ёшда эканлигига ишониш қийин.
Тара Рид
12 ёшидан бери фильмларда суратга тушадиган Тара Рид «Американча пирог»да ҳам рол ижро қилган. Шундан кейин актриса машҳурликка эришган, аммо бу билан унинг ўзига берадиган баҳоси ортмаган чоғи, кўринишини ўзгартириш учун пластик жарроҳларга мурожаат қилган. Липосакция қилдирган, яъни ортиқча ёғларни олдириб ташлаган, шунингдек, ринопластика (бурун шаклини ўзгартириш), бу ҳам етмагандек ботокс қилдирган. Оқибатда эса ёшидан 5-7 ёш катта кўринишга эга бўлган актрисанинг 44 ёш эканлигига ишониш қийин.
Лара Флинн Бойл
Лара пластик операцияларга шунчалик муккасидан кетганидан, уни ҳатто папарациядан беркинишига ҳам ҳожат қолмаган. У қош ва қовоқларни юқорига кўтариш, бурун шаклини ўзгартириш, лабини шишириш операцияларини бошдан кечирган ва ботокс қилдиришни ҳам канда қилмаган. Шундан кейин актрисани аввалгидек фильмларга таклиф қилмай қўйишган, бу эса унинг психологиясига таъсир қилмай қолмаган. Бир қанча шифокорлар Ларанинг ташқи кўриниши нафақат операциялар, балки стресс ва гормонал ўзгаришлар сабаб ҳам шундай кўринишга келиб қолган, деб ҳисоблайди.
Мег Райан
Мухлислар «Сизга мактуб» фильмида Мег Райанни пикси услубидаги соч турмаги ва ёқимли табассуми билан эслаб қолган. Сўнгги йилларда эса унинг ташқи кўриниши ўзгарган ва шишгандек кўринишига филлерли инъекцияларни ва ботоксни ошириб юборгани сабаб бўлган, деган тахминлар йўқ эмас. Бундан ташқари, контур пластикаси ва лифтинг муолажаларини ҳам амалга оширган. Лекин бу каби ўзгаришлар боис у кўринишидаги ўзига хослик ва ҳуснини йўқотган.
Рене Зеллвегер
Актриса «Брижит Жонс кундалиги» фильмидаги роли билан машҳурликка эришган. У вақтда унинг ўзига ярашган ёноқлари, шаҳло кўзлари ҳамда ва ғунча лаблари бўлган. Аммо унинг ташқи кўринишидан кўнгли тўлмаган ва косметолог ҳамда жарроҳларга мурожаат қилган. Операциялардан кейин Рене аввалгидек латофатли бўлмай қолган.
Эммануэль Беар
Француз актрисаси бундан бир неча 10 йил аввал гўзаллик тимсоли бўлган. Мухлислари экранда кўриб, экран қаршисига михланадиган даражада жозибали бўлган актриса эса ўзининг ингичка лабларидан кўнгли тўлмаган. У мурожаат қилган шифокорлар жарроҳлик давомида хатога йўл қўйган: махсус биополимер ўрнига техник силикондан фойдаланилган. Бу эса унинг юқори лаб шаклини хунук кўрсатиб қўйган. Бунинг оқибати эса унинг айрим суратларида билинади, актриса табассум қилгандек эмас, иржайгандек кўринади. Беарнинг ўзи ҳам қилдирган операциясидан афсусланган, аммо шунча уринишларга қарамай, табиий ҳолига қайтара олмаган.
Долли Партон
Долли қоматини ўзгартириш учун қилдирган операциясидан кейин сунъий кўринишга эга бўлиб қолган. Қолаверса. шундан кейин умуртқа поғонаси билан муаммолар келиб чиқа бошлаган. Шунингдек, хонанда лаби, ияклари шакли, ёноқларини ҳам ўзгартириб, юзини торттирган.
Изоҳ (0)