Энергетика вазирлиги Тошкент ва бошқа вилоятларда автомобилларга газ қуйиш компрессор шохобчаларига (АГҚШ) газ етказиб бериш жадвалига вақтинча чекловлар киритишни режалаштирмоқда. Бу ҳақда «Gazeta.uz» хабар берган.

Фото: «Дарё»

Аввалроқ 1 ноябрдан бошлаб Тошкентдаги 54 та ёқилғи қуйиш шохобчаларида янги иш тартибини жорий этишни режалаштирилаётгани ва ҳар уч кунда навбатма-навбат (ҳаммасида бир вақтда эмас), 19:00 дан 7:00 гача газ етказиб бериш тўхтатиб турилиши хабар қилинган. Ушбу чора аҳоли ва ижтимоий соҳа объектларини газ билан узлуксиз таъминлашга қаратилгани, одам кўп бўлган соатларда ёқилғи қуйиш шохобчаларида газ истеъмол қилишнинг юқори бўлиши туфайли босим камайиши қайд этилганди.

Энергетика вазирлигининг маълум қилишича, яқин кунларда бутун мамлакат учун янги жадвал ишлаб чиқилиб, оммага тақдим этилади.

27 октябрдан бошлаб Андижон вилоятидаги газ қуйиш шохобчаларида газ етказиб бериш вақти соат 6:00 дан 16:00 гача чекланган.

Давлат статистика қўмитаси маълумотларига кўра, 2020 йилнинг ортда қолган 9 ойи давомида газ қазиб чиқариш деярли 20 фоизга, яъни 44,8 миллиарддан 36 миллиард кубометргача камайган. Газ конденсати 35 фоизга, 1,5 миллион тоннадан 1 миллион тоннага, кўмир — 3 фоиз, яъни 2,7 миллиондан 2,6 миллион тоннагача камайган.

Йил бошидан буён бюджет соҳалари эҳтиёжлари учун 405 минг 400 тонна кўмир етказиб берилган, бу ўтган йилга нисбатан 18,3 фоизга кўп.

Аввал «Ҳудудгазтаъминот» корхонаси вакили Абдусаттор Қаюмов янги қурилаётган кўп қаватли уйларда марказлаштирилган иситиш тизими ўрнига маҳаллий иситиш тизими ўрнатилаётгани ва бунинг кўп газ сарфланишига олиб келиб, газ экспортининг камайиши ички бозорга газ етказиб беришни кўпайтиришга ёрдам бермаётгани ҳақида гапирган.