Тошкент шаҳрида 19 октябрдан бошлаб жамоат транспорти йўловчиларнинг тиббий ниқоб ва қўлқопда бўлиш тартиби жорий этилганидан кейин ижтимоий тармоқларда ишлатилган қўлқоплар билан тўлган чиқинди идишлари ва улар билан ифлосланган ерости пиёдалар йўлакларининг ҳолати акс этган суратлар тарқалди ва муҳокамаларга сабаб бўлди. Хусусан, шундай ҳолатлар метро бекатларининг чиқиш жойларида ҳам кузатилди. Тошкент метрополитени мазкур ҳолатга ўз муносабатини билдирди.
Фото: Telegram
Маълум қилинишича, мавжуд вазиятни ҳисобга олган ҳолда метрополитен маъмурияти зудлик билан корхонанинг тозалаш ишлари жадвалини қайта кўриб чиқди. Ишлатилган қўлқоплар учун қўшимча чиқинди идишлари ўрнатилиши ва кейинчалик бу ишлатилган қўлқоплар утилизация қилиниши назоратга олинади.
«Тошкент метрополитени маъмурияти ушбу муаммога эътибор қаратган, бефарқ бўлмаган юртдошларимизга ўз миннатдорчилигини билдиради. Шу фурсатдан фойдаланган ҳолда барча йўловчилардан тозалик қоидаларига риоя қилишни сўраб қолади. Шунингдек, метрополитен ходимларининг меҳнатини қадрлаган ҳолда ишлатилган қўлқопларни чиқинди ташлаш учун мўлжалланган идишларга ташлашни илтимос қилади», — дейилади Тошкент метрополитени хабарида.
Эслатиб ўтамиз, турли юқумли мавсумий инфекциялар тарқалишининг олдини олиш ва йўловчилар саломатлигини асраш мақсадида 19 октябрдан бошлаб Тошкент шаҳар жамоат транспорти (автобус, метро, йўналишли такси) хизматидан фойдаланганда йўловчиларнинг тиббий ниқоб ва қўлқопда бўлиш тартиби жорий этилди, мазкур шахсий ҳимоя воситалари йўловчиларга бепул тарқатилмоқда.
