«Ливерпуль» ва «Манчестер Юнайтед» клублари Англиядаги 2 та мусобақадан воз кечишни таклиф қилди

«Ливерпуль» ва «Манчестер Юнайтед» жамоалари Премьер Лигага ўзгартиришлар киритишга ҳаракат қилмоқда.

Аввалроқ икки клуб биргаликда катта ўзгаришларга олиб келадиган таклиф лойиҳасини тайёрлагани хабар қилинганди. Лойиҳа билан «Ливерпуль»га эгалик қиладиган АҚШнинг Fenway Sports Group компанияси шуғулланди.

Лойиҳада келтирилган таклифлардан бирида Англияда Лига Кубоги ва мамлакат Суперкубоги мусобақаларидан воз кечиш назарда тутилган. Вариантлардан бирида Лига Кубогини қолдириш, бироқ уни Еврокубокларда иштирок этадиган клубларсиз ўтказиш таклиф этилган.

Аввалроқ ушбу лойиҳада АПЛ клублари сонини 20 тадан 18 тага қисқартириш ҳақида гап боргани айтилганди.

Мазкур режани EFL раҳбари Рик Парри қўллаб-қувватламоқда. У «Ливерпуль» хўжайинлари, америкалик инвестор Жон Генри, шунингдек, аксионер ва директор Майкл Гордон билан музокаралар ўтказган. Бундан ташқари Парри «Манчестер Юнайтед»га эгалик қиладиган Глейзерлар оиласи билан ҳам суҳбат қурган.

Лойиҳа муаллифлари «Манчестер Сити», «Арсенал», «Челси» ва «Тоттенҳэм» каби катта клублар томонидан қўллаб-қувватлашни кутмоқда.