Tashkent City’да «Мендирман Жалолиддин» тарихий сериалининг биринчи қисми тақдимоти бўлиб ўтди. Бу ҳақда «Дарё» мухбири Феруз Муҳаммад маълум қилди.
Тақдимотда Ўзбекистон Президенти маслаҳатчиси Абдужаббор Абдувоҳидов, Ўзбекистон маданият вазири Озодбек Назарбеков, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари Саида Мирзиёева, Туркиянинг Ўзбекистондаги фавқулодда ва мухтор элчиси Меҳмет Сурайя Эр, «Боздағ фильм» кинокомпанияси раҳбари Меҳмет Бўздағ ва «Orient Финанс Банк» бошқарув кенгаши раиси Бобур Парпиев тарихий сериал, унинг суратга олиш жараёнлари ҳақида гапирди.
Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, лойиҳа раҳбари Саида Мирзиёева сериал ғоясининг қўллаб-қувватлаш сабаби, пандемия сабаб сериал бу йил якунланмай қолишидан хавотир олгани ҳақида гапирди.
Бугун нафақат тақдимот маросими, балки ўзбек миллий киночилигимизда янги саҳифа очилади, десак муболаға бўлмаса керак. Умид қиламанки, бу фикримга сериални томоша қилиб ўзингиз ҳам амин бўласиз.Дадам Самарқанд вилояти ҳокими лавозимига тайинланиб, биз Жиззахдан Самарқандга кўчиб келганимизда, бу шаҳар менда қандай таассурот қолдирганини жуда яхши эслайман. Дадам озгина бўш вақт топдилар дегунча бизга Самарқандни кўрсатар, тарихий обидалар билан таништирар ва буюк тарихий шахслар ҳақида сўзлаб берар эдилар.
Бўш вақтимда тез-тез ўша қадимий масканларни зиёрат қилиб, буюк қаҳрамонлар ҳаётини ўрганар эдим. Шоҳи Зинда, Бибихоним, Регистон майдонида юрар эканман, хаёлимда ўша тарихий даврларни тасаввур қилар эдим. Гўё атрофимда бир неча аср олдинги ҳаёт қайнаётгандек, сершовқин бозорлар, отларнинг кишнаши ва сарой саҳналари, тасаввуримдаги ўша ажиб воқеалар хотирамда бир умрга муҳрланиб қолган.
Бир кун келиб, имкони бўлиши биланоқ ўтмишдаги буюк тарихий шахслар ҳақида бирор фильм олинишига ўз ҳиссамни қўшаман, деган ният бўлар эди. Чунки, фақат фильмлар орқалигина ўша манзарани тасвирлаб бериш мумкин, деб ўйлардим. Бир сўз билан айтганда, менинг тарихга бўлган қизиқишим айнан Самарқанддан бошланган.
Йиллар ўтиб, тақдир тақозоси билан мен Ўзбекистон имижини хорижий давлатларда шакллантириш, матбуот ва тарғибот ишларига масъул бўлиб фаолият юритишни бошладим. Шу аснода бундан бир ярим йил олдин ҳозирги Маданият вазири Озодбек Назарбеков томонидан Хоразмшоҳ Жалолиддин Мангуберди ҳақида турк ҳамкасблари билан сериал суратга олиш таклифи берилди.
Албатта, биз бу ғояни қўллаб-қувватладик. Чунки, ўзингиз яхши биласиз, афсуски, ўзбек миллий киночилигида тарихий шахслар, буюк алломаларимиз ҳаётига бағишланган сериаллар деярли йўқ даражада. Сериаллар яратилиши эса нафақат тарихни ўрганиш, балки буюк боболаримиз ҳаёти билан яқиндан танишиш имконини беради. Бундай сериаллар ҳар бир ўзбек миллати вакилида миллий ғурурни шакллантиради, ўзбек халқининг қаддини янада баланд кўтаради.
Жараён бошланди. ‘Orient Финанс Банк’ бу лойиҳани тўлиқ молиялаштиришга рози бўлди. Туркия ижодкорлари билан ҳамкорликда ўттиз гектарлик ерда суратга олиш майдонлари яратилди. Жалолиддин саройи, жанг майдонлари барпо этилди. Ўша даврдаги миллий кийимларимиз, урф-одат ва анъаналаримизнинг ҳар бир деталларига алоҳида ёндашилди.
Ҳаммаси жуда яхши кетаётганди, лекин пандемия балоси бизнинг ишларимизга ҳам жиддий зарар келтирди. Карантин даврида суратга олиш ишлари режадан чиқиб кетди. Қанчадан қанча ижодкорлар Туркияда яшаб, ўша ерда сабр қилишларига тўғри келди. Очиғини айтаман, лойиҳамизнинг бу йилда якунланишига шубҳа қила бошладим.
Лекин Аллоҳнинг қўллаб-қувватлаши, фидоий ижодкорларимизнинг сайъи-ҳаракатлари билан мана бугун тақдимот кунига ҳам етиб келдик.
Бугун ушбу сериалнинг биринчи қисмини намойиш қиламиз. Албатта, бу сериал турли баҳс, мунозара, балки танқидларга ҳам учрар. Биз бунга тайёрмиз. Биз ҳар бир фикрни ҳурмат қиламиз ва фикрлар хилма-хиллигини қўллаб-қувватлаймиз. Нима бўлганда ҳам олдимизга қўйган ҳар бир режамизни бажарамиз. Бу лойиҳани ҳам уддалай олдик, деб ўйлайман.
Бунинг учун барча ижодкорларга, актёрларимизга, ҳомий ‘Orient Финанс Банкъга, Маданият вазирлигига ва шахсан Озодбек Назарбеков ҳамда лойиҳа бош продюсери Меҳмед Боздағга катта раҳмат айтмоқчиман. Яна бир бор ғурур билан айтаман, биз уддаладик.
Саида Мирзиёева, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари, лойиҳа раҳбари
Маълумот учун, «Мендирман Жалолиддин» сериалининг биринчи фасли 13 қисмдан иборат. Лойиҳа раҳбари Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари Саида Мирзиёева. Ғоя муаллифи ҳамда продюсер Ўзбекистон Республикаси Маданият вазири Озодбек Назарбеков. Фильм Туркиянинг «Боздағ фильм» компанияси томонидан суратга олинмоқда. Кенг жамоатчилик учун премьера 2021 йилнинг январь ойидан бошланади.
Изоҳ (0)