Жанубий Кореянинг Ўзбекистондаги элчихонаси 24 сентябрдан бошлаб коронавирусга ПЗР-тести маълумотини тасдиқлаш учун консуллик текшируви тизимини жорий қилди ва лабораториялар рўйхатига ўзгартириш киритмоқда. Бу ҳақда элчихона матбуот хизматига таяниб «Gazeta.uz» хабар берди.
Фото: Yonhap
Қайд этилишича, Ўзбекистондан Жанубий Кореяга боришни режалаштираётган фуқаролар (шу жумладан транзит йўловчилар) учиб келгандан сўнг элчихонада томонидан тасдиқланган клиникадан ПЗР усулда олинган COVID-19’га қарши тест натижаси салбий чиққанини кўрсатувчи маълумотномани кўрсатишлари керак (тест учиб кетишдан 48 соат аввал олинган бўлиши лозим).
Айни пайтда Тошкентдан чартер рейсларда фақат Жанубий Корея фуқаролари ва уларнинг оила аъзоларигина учишга рухсат этилганлигига қарамасдан амалдаги визага эга бўлган кўплаб Ўзбекистон фуқаролари учинчи мамлакатлар орқали Жанубий Кореяга кириб келмоқда.
Элчихона маълумотларига кўра, Ўзбекистондан жўнаб кетаётган ва Жанубий Кореяга учинчи давлатлар орқали кириб келаётган ўзбекистонликларда ПЗР-тест натижаси манфий чиққанини кўрсатувчи маълумотнома борлигига қарамай, бошқа мамлакатларга қараганда COVID-19’га қарши тест натижалари ижобий чиқиши ҳоллари кўпроқ учрамоқда.
Жанубий Корея ОАВларининг хабар беришича, Ўзбекистондан кириб келган, маълумотномага эга 421 нафар чет элликларнинг 52 нафари (12,4 фоизи)да COVID-19 тасдиқланган.
«Бу айрим шахслар ПЗР-тест натижаси салбий чиққан маълумотномани сохталаштираётгани ёки салбий натижали маълумотнома олиш учун тестнинг атайлаб нотўғри ўтказилаётгани, ёки учинчи мамлакат транзит зонасида вирус юқтириб олаётганидан далолат беради. Шу сабабли Жабубий Кореяга учиб келинганда COVID-19’га қарши тест ижобий чиққан жуда кўп ҳоллар аниқланмоқда», — дейилади элчихона хабарида.
Элчихона ПЗР-тести натижаси қалбакилаштирилганда ёки Жанубий Кореяга кириш учун бошқа нотўғри йўллар орқали манфий натижа ҳақидаги маълумотнома ноқонуний йўл билан олинганда, қоидабузар жиноий жавобгарликка (1 йилгача қамоқ ёки 10 миллион вон — 8500 долларгача жаримага) тортилиши ёки депорт қилиниши (шу жумладан, мамлакатга киришга тақиқ қўйилиши)ни ҳисобга олишни сўраган.
Қайд этилишича, Ўзбекистондан келган шахслар орасида COVID-19’га чалинганлар сони мунтазам ортадиган бўлса, қатъий карантин чораларини жорий этишдан тортиб мамлакатга Ўзбекистондан келганларни киритмаслик масаласигача кўриб чиқилиши мумкин.
24 сентябрь куни Swiss Lab элчихона томонидан тасдиқланган тиббий муассасалар рўйхатидан чиқарилган. Айни пайтда Тошкентнинг Миробод тумани, Қўйлиқ-5 мавзесида жойлашган Korea №1 Laboratory натижалари тан олинади.
Хабар ёзилган вақтда Жанубий Кореяда 23 661 киши коронавирусга чалингани, уларнинг 21 292 нафари соғайгани, 406 нафари вафот этгани расман тасдиқланган.
