Samsung яқинда ўзининг Galaxy S20 FЕ (Galaxy S20 Fan Edition) русумли ҳамёнбоп флагманини намойиш этганди.
Фото: YouTube
«Terabayt.uz»нинг ёзишича, ушбу «енгиллаштирилган» флагман кўплаб уяли алоқа операторлари томонидан ҳам сотилади. Шулардан бири – Т-Mobile компанияси мижозларни Galaxy S20 FЕ’га янада қизиқтириш учун антиқа ишга қўл урди. Оператор тарихдаги энг ғалати анбоксинг видеосини чиқарди – унда Samsung смартфонининг қадоғини очиш, синаб кўриш ишларининг барчаси сув остида бажарилган.
Мазкур лавҳадан маълум бўляптики, Galaxy S20 FЕ нафақат самарадорлик бўйича яхши, балки унинг сувдан ҳимояси ҳам мустаҳкам экан. Тўғри, махсус эффектлардан ҳам фойдаланишган – масалан, ўйин учун Samsung МOGA PowerА XP5-Х контроллерини қўллашда. Гап шундаки, бу гаджет сув остида ишлай олмайди, шу боисдан ўйин жараёнини «қуруқ шароитларда» ёзиб олиб, кейин сув тубида шунчаки унинг видеосини қўйиб кўрсатишган.
Роликда бошловчи вазифасини Т-Mobile компаниясининг креатив контент бўйича директори Десмонд Смит бажарган. У сув тагида қурилманинг қадоғини очиб, смартфонни ёқиб, айрим ўйинларни ўйнаб кўрсатган. Ўз ҳаракатларини изоҳлаб гапирган бўлса-да, гапларини англаш қийин, шунинг учун видеороликни субтитрлар билан тақдим этишган.
