АҚШ Хитойдан пахта импорт қилишни чеклашга тайёргарлик кўрмоқда. Ушбу ҳафта АҚШ божхона ва чегарани қўриқлаш агентлиги Синьцзян провинциясидаги яна бешта Хитой компаниясининг импортига тақиқ қўйди — «қора рўйхат» тўққизтага етди, деб ёзади Spot.

Фото: AP Photo

Санкцияларга мажбурий меҳнатдан фойдаланилиши сабаб бўлмоқда. Тақиқларнинг аксарияти пахтага тааллуқли, Синсзян эса Хитойдаги жами пахтанинг 2/3 қисмини етказиб беради.

Американинг Forbes журнали ёзишича, бу каби ўзгаришларда Ўзбекистон яққол кўзга ташланмоқда. Яқин вақтларгача пахта далаларида мажбурий меҳнатга оддий ҳолат сифатида қараб келинарди, бироқ сўнгги йилда ҳукумат муаммо билан жиддий шуғулланиб, уни имкон борича бартараф этишга уринмоқда.

Нашрнинг таъкидлашича, мамлакат бу ишни ҳатто АҚШ томонидан босим ўтказилмаётган бўлса-да, амалга оширмоқда, чунки Америка нотинч Афғонистон минтақаси сабаб стратегик аҳамиятга эга давлат билан муносабатларни бузишни истамайди.

Forbes асосий ютуқларни санаб ўтган — далаларда мажбурий болалар меҳнати йўқ, теримчиларга тўланадиган ҳақ ошган, пахтага давлат буюртмаси бекор қилинган. Шу сабабли The Economist Ўзбекистонни йил мамлакати деб атаган.

«Ўзбекистон мажбурий меҳнатни қисқартириш йўлида тез одимламоқда. У ҳозирга қадар Хитой пахтаси эгаллаган жойни банд этиши мумкин. Бу Ўзбекистонни Марказий Осиёнинг глобал миқёсдаги интеграциялашган иқтисодиётига айланишида ижобий таъсир кўрсатган бўлар эди», — дейилади мақолада.

Мавзуга доир: Англия юқори суди ўзбек пахтасини Европа Иттифоқига экспорт қилишга қарши даъвони рад этди

Маълумот учун, узоқ йиллар давомида пахта терими мавсумида болалар ва мажбурий меҳнатдан фойдаланилгани боис Ўзбекистон пахтаси халқаро жамоатчилик томонидан «қора рўйхат»га киритилган, етакчи ишлаб чиқарувчилар Ўзбекистон пахтасини бойкот қилган эди. Халқаро меҳнат ташкилотининг Вашингтондаги офиси директори Кевин Кассиди эса ўзбек пахтаси бойкотини асоссиз деб эълон қилганди.

2019 йилнинг 4 февралида ўша вақтдаги бош вазир ўринбосари Танзила Норбоева бошчилигидаги делегациянинг Вашингтонга ишчи ташрифида Cotton Campaign тўқимачилик маҳсулотларига қарши бойкотни бекор қилиш бўйича режасини тақдим этган эди.