Журналист, актриса ва хонанда Ирода Носирова «Дарё» интернет-нашрига эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Фото: «Дарё»

Ирода Носирова суҳбат давомида кинода тақиққа учраши сабабини маълум қилди.

Буни тақиқлар занжири деса ҳам бўлади. Ўша вақтларда деярли фақатгина давлат телеканаллари фаолият юритар эди, хусусий каналлар деярли йўқ эди. Телевидениеда барча эшиклар мен учун ёпилганидан сўнг киноларда рол ижро қилишга рози бўлганман. Уч-тўртта фильмда рол ижро этдим. Ўшанда ҳам ўзимга мос бўлган ролларни танлаб ижро этишга ҳаракат қилдим.

У вақтларда фильмларнинг илк тақдимоти, яъни премьералар жуда ҳам дабдабали бўларди. Премьераларнинг бирида олдимга ўша вақтдаги кино раҳбарларидан бири келиб, ‘Иродахон, сизнинг мухлисингизман, сиз кўпроқ фильмларда чиқишингиз керак, сизга ёрдам бераман, шу соҳада фалон креслода ўтираман’, деди.

Эртаси кундан менга режиссёрлар телефон қилиб, ‘Расмларингизни олиб келинг, синовларга келинғ, дейишди. Фотосиновларга бориб, ҳаттоки синовлардан ҳам ўтдим. Бир-икки кундан сўнг ҳалиги одам кечқурун телефон қилиб, ‘бир жойга келиб кетинг, Иродахон’, деди. ‘Нима гап?’, десам, ‘сизни акаларим билан таништираман’, деди. У одам улар билан гаров ўйнаган экан. Бормадим. Бормайман деб қатъий айтганимдан сўнг сенсирашга ўтиб, ‘Сен эртага кинода рол ижро этишингни ўйлаб кўргин, кинонинг остонасидан қадам босмайсан’, деди. ‘Қўлингизда осмон бўлса, ташлаб юборинғ, дедим. Қўлида кино бор экан, ташлаб юборди.

Эртаси куни фотосиновларидан ўтган режиссёрларим телефон қилиб, ‘сизни бизга таклиф қилган одам запрет қилди, нима бўлди ўзи, тинчликми?’, деб сўрашди. ‘Ҳаммаси жойида, запретлар мени қўрқитмайди’, дедим.

Хуллас, вақтлар ўтиб у одамнинг ўзи ҳам раҳбарликдан кетди. Ундан кейин бир-иккита фильмларда суратга ҳам тушдим. Ўша вақтларда бир режиссёр мени янги бир лойиҳасига таклиф қилди. Фильм сценарийси айнан мен учун ёзилган эди. Ҳаммаси тайёр бўлиб, ролга киришиб, кийимлар тикилганидан сўнг ‘Ирода бир ҳомий бор, у шу фильмга пул тикмоқчи, ҳаттоки тиккан пулини ҳам қайтариб олмас экан, фақат у хоҳлаган қизни бош ролда ўйнатишим керак экан’, деди. Ўзимни шу ролда тасаввур қилиб, шу ролда яшаганман. ‘Агар сен менинг ёнимда бўлсанг, менга ҳеч нима керак эмас, биз бу нарсаларни биргаликда енгиб ўтамиз’, деди, ‘Шарт эмас, раҳмат, йўлингизда давом этинғ, деб кетдим.

Шу билан кинодан кўнглим совиб кетди. Бу ҳамма режиссёрларга тегишли эмас. Мен ижодини ҳам, ўзини ҳам ҳурмат қилган режиссёрлар жуда ҳам кўп. Кетма-кет бўлган шунақа ҳолатлар кўнглимнинг совишига сабаб бўлди. Кейин кинодан ҳам узоқлашишга мажбур бўлдим.

Ирода Носирова, журналист, актриса, хонанда

Маълумот учун, Ирода Носирова фаолиятини «Давр» информацион дастурида спорт шарҳловчиси сифатида бошлаган. «Алвидо», «Омад», «Жаноб ҳеч ким» каби фильмларда бош ролларни ижро этган. Хонанда сифатида «Кел» деб номланган қўшиғи мухлислар орасида оммалашган. Ирода Носирова 18 йиллик норасмий тақиқлардан сўнг 2020 йилдан Zo‘r TV каналида журналист, бошловчи сифатида фаолиятини бошлади.