Ўзбекистонда Марказий Осиё халқаро институти ташкил этилди. «Дарё»нинг ҳукуматдаги манбаси берган маълумотга кўра, бу ҳақда тегишли қарор Президент Шавкат Мирзиёев томонидан август ойида имзоланган.
Қайд этишларича, Марказий Осиё халқаро институти минтақа давлатлари раҳбарлари Маслаҳат учрашувининг Тошкентда бўлиб ўтган иккинчи саммитида эришилган барча келишувларни тўлиқ амалга ошириш, эксперт-таҳлил доира вакиллари, амалиётчи мутахассислар ўртасидаги алоқаларни кенгайтириш, минтақавий стратегияни ишлаб чиқишда улар иштирокини таъминлаш мақсадида ташкил этилган.
Минтақа давлатлари ўртасидаги ўзаро ҳамкорликни ҳар томонлама кенгайтиришга қаратилган стратегия ва дастурларнинг янги йўналишларини ишлаб чиқишга кўмаклашиш, уларни илмий асосланган ҳолда чуқур таҳлил қилиш ва тадқиқ этиш янги ташкил этилган институтнинг асосий вазифалари сифатида кўрсатиб ўтилган.
Шунингдек, институт минтақа давлатлари ўртасидаги алоқаларни мустаҳкамлашга қаратилган изланишлар, Марказий Осиё хавфсизлиги билан боғлиқ бошқа таҳдид ва муаммоларни ҳал этишга қаратилган тадқиқот ишларини олиб боради, қўшни давлатларнинг ташқи сиёсат концепция ва мақсадларини пухта ўрганади, минтақавий аҳамиятга эга лойиҳаларни батафсил таҳлил қилади ва халқаро анжуман ва тадбирларда бу мавзуларни муҳокама қилади.
Эслатиб ўтамиз, Шавкат Мирзиёев БМТ Бош Ассамблеясининг 2017 йилда бўлиб ўтган 72-сессиясидаги чиқишида Марказий Осиё давлатлари президентлари мунтазам учрашувлар ўтказишини таклиф қилган эди.
